Прэзыдэнцкія выбары стануць сур’ёзным іспытам на трываласьць усёй сыстэмы праваахоўных органаў, заявіў міністар унутраных спраў Юры Караеў у звароце да супрацоўнікаў МУС.
Відэазапіс звароту апублікаваў у сваім тэлеграм-канале журналіст «Нашай Нівы» Арцём Гарбацэвіч.
Афіцыйны прадстаўнік МУС Вольга Чамаданава патлумачыла БелаПАН, што друкаваны варыянт звароту міністра апублікавалі ў газэце «На страже», а відэа разаслалі ў рэгіёны для супрацоўнікаў.
«Яно не сакрэтнае», — сказала Чамаданава.
У звароце Караеў адзначыў:
«Больш за чвэрць стагодзьдзя мы жывем у стабільнай дзяржаве, якая дынамічна разьвіваецца, прыярытэтамі якой ёсьць дабрабыт народу, міралюбная зьнешняя палітыка і нацыянальная бясьпека. Сёньня мы працуем, гадуем дзяцей пад мірным небам, памнажаем дасягненьні нашай краіны».
ГЛЯДЗІЦЕ ТАКСАМА: «Нас вучылі разганяць пратэсты». Гісторыя адстаўнога сяржанта, які галасаваў за Лукашэнку, а цяпер агітуе за Ціханоўскую
Караеў адзначыў, што прэзыдэнцкія выбары — найважнейшая грамадзка-палітычная падзея, якая стане «ня толькі чарговай вяхой у разьвіцьці сувэрэннай краіны, але і сурʼёзным іспытам на трываласьць усёй сыстэмы праваахоўных органаў».
«Ад нас спатрэбяцца выключная арганізаванасьць, высокая асабістая дысцыплінаванасьць і вытрымка, — заявіў міністар. — Наперадзе значныя псыхалягічныя і фізычныя нагрузкі. Цяпер у інтэрнэце і на вуліцах гарадоў мы назіраем актыўную правакацыйную дзейнасьць некаторых грамадзянаў. З аднаго боку, мэтай штучнага стварэньня інфармацыйных выклікаў ёсьць фармаваньне ў грамадзтве нэгатыўнага стаўленьня да міліцыі і дзяржорганаў у цэлым. Зь іншага — імкненьне пасеяць у сьвядомасьці саміх супрацоўнікаў няўпэўненасьць і нежаданьне выконваць абавязак па ахове грамадзкага парадку і барацьбе з злачыннасьцю».
Караеў заклікаў супрацоўнікаў праваахоўных органаў не паддавацца на правакацыі і ня даць «нагодаў дыскрэдытаваць органы ўнутраных спраў, саміх сябе і блізкіх».
Ён таксама запэўніў падначаленых, што «актыўная пазыцыя МУС і дзейнае заканадаўства дазваляюць абараніць гонар і годнасьць кожнага з вас».
«Мы — адзіны калектыў беларускай міліцыі — зробім усё, каб выбары прайшлі спакойна і без ускладненьняў», — завяршыў свой зварот Караеў.
ГЛЯДЗІЦЕ ТАКСАМА: Лукашэнка амапаўцам: «Хлопцы мусяць разумець, што яны ў сваім доме і нікому не дазволена іх біць нагамі» ГЛЯДЗІЦЕ ТАКСАМА: Які сыгнал «міласэрны» Лукашэнка дасылае сілавікам ГЛЯДЗІЦЕ ТАКСАМА: «Ад удзелу ў разгоне дэманстрацый можна адмовіцца». Гутарка з былым афіцэрам унутраных войскаўПрэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.