Паводле статыстыкі з сайту Цэнтральнай выбарчай камісіі, у суды Беларусі паступіла 484 скаргі на ўтварэньні выбарчых камісіяў на прэзыдэнцкіх выбарах 2020 году. На 415 скаргаў адказалі адмовай у задавальненьні, 69 пакінулі без разгляду. Не задаволілі ніводнай.
Зь ліку ўсіх скаргаў 5 тычыліся абласных выбарчых камісіяў, 3 — менскай гарадзкой, яшчэ па адной — на раённую камісію ў Берасьцейскай вобласьці і раённую ў Менску. Усе адхілілі.
474 скаргі тычыліся ўтварэньня ўчастковых камісіяў. Зь іх 69 пакінулі без разгляду, 405 адхілілі. Найбольш падавалі такіх скаргаў у Магілёўскай вобласьці (160) і ў Менску (152).
27 ліпеня адну такую скаргу разглядаў Берасьцейскі абласны суд, расказвае кампанія «Праваабаронцы за свабодныя выбары». Адна з заяўніц, спадарыня Панасюк, патрабавала распачаць грамадзянскую справу за тое, што яе вылучылі ў камісію 14 асобаў, але яе адмовіліся ўключаць. Судзьдзя Сьвятлана Ільлюшына спачатку заявіла, што тэрмін для падачы скаргі прапушчаны, а калі выявілася, што ўсё ж скарга была сваечасовай, проста пакінула яе без задавальненьня. На ўвесь разгляд пайшло 20 хвілінаў.
ГЛЯДЗІЦЕ ТАКСАМА: «Сумленныя людзі» і «Права выбару» заклікалі запісвацца ў назіральнікі, нягледзячы на абмежаваньні ЦВК ГЛЯДЗІЦЕ ТАКСАМА: ЦВК адказала на масавыя звароты ў сувязі з абмежаваньнем колькасьці назіральнікаў на ўчасткахПрэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.