Выбары-2020

Маці і нявеста зьняволенага ў «справе Ціханоўскага» анансавалі бестэрміновую галадоўку

Зьміцер Фурманаў на дыстанцыйным судзе ў Горадні, ілюстрацыйнае фота

Маці Зьмітра Фурманава Вольга Фурманава, а таксама ягоная дзяўчына Вольга Каракіна абвясьцілі пра бестэрміновую галадоўку. Яны патрабуюць вызваліць Зьмітра і ўсіх палітвязьняў, а таксама — спыніць крымінальны перасьлед зьняволеных па 342 артыкуле Крымінальнага кодэксу Беларусі.

Гарадзенкі пачнуць галадоўку 26 ліпеня а 13:00 каля СІЗА №1 на Валадарскага ў Менску.

Апавяшчэньне аб сваёй акцыі яны накіравалі ў Горадзенскі аблвыканкам, Адміністрацыю прэзыдэнта, Савет Рэспублікі Беларусь, СІЗА №1, МУС Беларусі, Сьледчы камітэт, Генэральную пракуратуру, прадстаўніку Эўразьвязу ў Беларусі, прадстаўніку ААН па правах чалавека ў Беларусі, Вярхоўны суд, спэцыяльнаму дакладчыку па правах чалавека ў Беларусі.

У апавяшчэньні яны папрасілі забясьпечыць ім бясьпеку і своечасовую мэдычную дапамогу на акцыі пратэсту.

Зьмітра Фурманава затрымалі 29 траўня ў Горадні на пікеце Ціханоўскай. Па словах ягонага бацькі Аляксандра Фурманава, яго схапілі людзі ў цывільным і вынесьлі разам з крэслам з-за стала, дзе Зьміцер зьбіраў подпісы за Сьвятлану Ціханоўскую.

ГЛЯДЗІЦЕ ТАКСАМА: «Была каманда затрымліваць усіх датычных». У Горадні асудзілі каардынатара ініцыятыўнай групы Ціханоўскай
ГЛЯДЗІЦЕ ТАКСАМА: «Адкажыце мне, як бацька бацьку». Тата затрыманага гарадзенца напісаў адкрыты ліст да Лукашэнкі. ВІДЭА

Затрыманьні Ціханоўскага і яго прыхільнікаў. Што трэба ведаць

  • Сяргей Ціханоўскі — відэаблогер, аўтар Youtube-каналу «Страна для жизни». Зьбіраўся балятавацца ў прэзыдэнты на выбарах 2020 году, але ягонай ініцыятыўнай групе адмовілі ў рэгістрацыі, калі ён быў у зьняволеньні. Але зарэгістравалі групу ягонай жонкі Сьвятланы Ціханоўскай, блогер стаў кіраўніком гэтай групы.
  • У Горадні а 20-й гадзіне 29 траўня Сяргея Ціханоўскага затрымалі супрацоўнікі АМАПУ падчас перадвыбарчага пікету за вылучэньне ў прэзыдэнты ягонай жонкі. Абставіны затрыманьня нагадвалі тыя, пра якія раней казаў Лукашэнка.
  • Гэта адбылося пасьля таго, як невядомая жанчына, якую сьведкі называлі правакатаркай, кідалася на блогера і спрабавала трымаць яго за вопратку. Яна патрабавала, каб Ціханоўскі адказаў, чаму ў Горадні няма яго жонкі. Ціханоўскі намагаўся сысьці ад жанчыны — зьявілася міліцыя.
  • Літаральна праз паўхвіліны прыбеглі супрацоўнікі АМАП і затрымалі Сяргея Ціханоўскага, які знаходзіўся за некалькіх мэтраў ад эпіцэнтру. Пазьней затрымалі таксама шэраг паплечнікаў Ціханоўскага. МУС паведаміла пра крымінальную справу за «гвалт супраць міліцыянтаў».

  • На лецішчы Ціханоўскага нібыта знайшлі 900 тысяч даляраў. Жонка мяркуе, грошы маглі падкінуць.
  • Ціханоўскага трымаюць за кратамі з 29 траўня 2020 году. Яго абвінавачваюць паводле чатырох артыкулаў Крымінальнага кодэксу:

ч. 1 арт. 293 (арганізацыя масавых беспарадкаў, да 15 гадоў зьняволеньня).

ч. 3 арт. 130 (распальваньне сацыяльнай варожасьці);

ч. 2 арт. 191 (перашкода працы ЦВК). Заяву на яго падала старшыня ЦВК Лідзія Ярмошына;

ч. 1 арт. 342 (арганізацыя дзеяньняў, што груба парушаюць грамадзкі парадак).