Як стала вядома праваабаронцам, на Сяргея Ціханоўскага завялі новую крымінальную справу.
Блогеру інкрымінуюць артыкул 191 Крымінальнага кодэксу — перашкода ажыцьцяўленьню выбарчых правоў, альбо рэалізацыі права заканадаўчай ініцыятывы грамадзянаў, альбо рабоце Цэнтральнай камісіі Рэспублікі Беларусі ў выбарах і правядзеньні рэспубліканскіх рэфэрэндумаў.
ГЛЯДЗІЦЕ ТАКСАМА: Ціханоўскі на судзе ў Гомлі: «Уладу ў Беларусі захапіў дыктатар Лукашэнка»Заяву супраць Сяргея Ціханоўскага накіравала ў адпаведныя органы старшыня ЦВК Лідзія Ярмошына. Свабода папрасіла чыноўніцу, каб яна падрабязьней паведаміла, што напісала ў сваёй скарзе, але тая праз сакратарку адмовілася, спаслаўшыся на занятасьць.
Раней у размове з журналістамі «Комсомольской правды в Беларуси» Ярмошына прызнала, што сапраўды была ініцыятаркай адной заявы ў дачыненьні да Ціханоўскага.
«Гэта зьвязана з тым, што гэтая група вяла сябе непрыстойна. У нас заўсёды пэрыяд збору подпісаў праходзіў культурна і карэктна. Нават у 2010 годзе, калі былі самыя гучныя выбары. Група Ціханоўскага імкнуліся расхістаць сытуацыю, выкарыстала збор подпісаў, накіраваўшы яе на зьмену ўлады. Выбары — гэта канстытуцыйны пераход улады, але не гвалтоўная зьмена», — патлумачыла Лідзія Ярмошына.
Сяргей Ціханоўскі цяпер знаходзіцца за кратамі, у карцары: супраць яго завялі крымінальныя справы за «гвалт супраць міліцыянтаў» і «перашкоду выбарам». Крымінальныя справы распачалі і супраць дзясятка ягоных паплечнікаў і чальцоў ініцыятыўнай групы ягонай жонкі Сьвятланы Ціханоўскай. Праваабаронцы прызналі Ціханоўскага і яго паплечнікаў палітычнымі зьняволенымі. Тым часам Сьвятлана Ціханоўская заяўляе, што ёй пагражалі адабраць дзяцей, калі яна ня здымецца з выбараў.
Затрыманьні Ціханоўскага і яго прыхільнікаў. Што трэба ведаць
- Сяргей Ціханоўскі — відэаблогер, аўтар Youtube-каналу «Страна для жизни». Зьбіраўся балятавацца ў прэзыдэнты на выбарах 2020 году, але ягонай ініцыятыўнай групе адмовілі ў рэгістрацыі, калі ён быў у зьняволеньні. Але зарэгістравалі групу ягонай жонкі Сьвятланы Ціханоўскай, блогер стаў кіраўніком гэтай групы.
- У Горадні а 20-й гадзіне 29 траўня Сяргея Ціханоўскага затрымалі супрацоўнікі АМАПУ падчас перадвыбарчага пікету за вылучэньне ў прэзыдэнты ягонай жонкі. Абставіны затрыманьня нагадвалі тыя, пра якія раней казаў Лукашэнка.
- Гэта адбылося пасьля таго, як невядомая жанчына, якую сьведкі называлі правакатаркай, кідалася на блогера і спрабавала трымаць яго за вопратку. Яна патрабавала, каб Ціханоўскі адказаў, чаму ў Горадні няма яго жонкі. Ціханоўскі намагаўся сысьці ад жанчыны — зьявілася міліцыя.
- Літаральна праз паўхвіліны прыбеглі супрацоўнікі АМАП і затрымалі Сяргея Ціханоўскага, які знаходзіўся за некалькіх мэтраў ад эпіцэнтру. Пазьней затрымалі таксама шэраг паплечнікаў Ціханоўскага. МУС паведаміла пра крымінальную справу за «гвалт супраць міліцыянтаў».
- На лецішчы Ціханоўскага нібыта знайшлі 900 тысяч даляраў. Жонка мяркуе, грошы маглі падкінуць.
- 14 сьнежня 2021 году Сяргея Ціханоўскага асудзілі на 18 гадоў зьняволеньня, прызнаўшы вінаватым паводле чатырох артыкулаў Крымінальнага кодэксу: ч. 1 арт. 293 (арганізацыя масавых беспарадкаў), ч. 3 арт. 130 (распальваньне сацыяльнай варожасьці); ч. 2 арт. 191 (перашкода працы ЦВК, заяву на яго падала старшыня ЦВК Лідзія Ярмошына), ч. 1 арт. 342 (арганізацыя дзеяньняў, што груба парушаюць грамадзкі парадак).
- Пасьля прысуду Ціханоўскі спачатку трапіў у папраўчую калёнію № 15 Магілёва. Але ў жніўні 2022-га яму ўзмацнілі рэжым і перавялі на 3 гады ў турму № 8 у Жодзіне, дзе зноў судзілі і дадалі яшчэ 1,5 года зьняволеньня за «непадпарадкаваньне патрабаваньням адміністрацыі». Агулам тэрмін зьняволеньня Сяргея Ціханоўскага цяпер складае 19,5 года.
- З сакавіка 2023 году сваякі Сяргея Ціханоўскага не атрымліваюць аніякай інфармацыі ад яго.
- Беларускія праваабаронцы прызналі Ціханоўскага палітычным зьняволеным.
- ПА АБСЭ і Эўрапарлямэнт патрабавалі вызваленьня Ціханоўскага, Статкевіча і іх паплечнікаў.