Кіраўнік Беларусі Аляксандар Лукашэнка ўзнагародзіў амбасадара Славаччыны ў Беларусі Ёзэфа Мігаша ордэнам Францыска Скарыны. Адпаведны ўказ ён падпісаў 15 чэрвеня, паведамілі БелТА ў прэс-службе Лукашэнкі.
Ёзэф Мігаш атрымаў гэты ордэн «за значны асабісты ўнёсак ва ўмацаваньне дружалюбных адносін і разьвіцьцё супрацоўніцтва паміж Беларусьсю і Славаччынай».
ГЛЯДЗІЦЕ ТАКСАМА: Пасьля менскага параду амбасадар Славаччыны падаў у адстаўкуАмбасадар Славаччыны ў Беларусі Ёзэф Мігаш быў адным зь нешматлікіх амбасадараў, якія наведалі парад на Дзень Перамогі ў Менску, нягледзячы на эпідэмію каранавірусу. Фактычна большасьць амбасадараў краін Эўразьвязу, акрамя амбасадараў Вугоршчыны і Славаччыны, не прынялі запрашэньня прыйсьці на парад. Ёзэф Мігаш свой удзел абгрунтаваў тым, што гэта прынцыповы момант, бо ён «сын партызана і антыфашыста».
14 траўня стала вядома, што Ёзэф Мігаш пайшоў у адстаўку. Паведамлялася, што Мігаш не параіўся са сваім Міністэрствам замежных спраў адносна рашэньня ўзяць удзел у парадзе 9 траўня ў Менску, чым парушыў пратакол. Канфлікт на гэтай глебе і стаў прычынай адстаўкі.
Лукашэнка назваў міжнародным скандалам адкліканьне амбасадара Славаччыны за ўдзел у парадзе на Дзень Перамогі ў Менску, заявіўшы, што рашэньне кіраўніцтва Славаччыны недапушчальнае.
ГЛЯДЗІЦЕ ТАКСАМА: Лукашэнка назваў міжнародным скандалам адкліканьне амбасадара Славаччыны за ўдзел у парадзе ў МенскуЁзэф Мігаш быў прызначаны ў Беларусь у 2016 годзе. Да таго працаваў у дыпляматычных прадстаўніцтвах сваёй краіны ў Расеі і ва Ўкраіне. Быў сьпікерам славацкага парлямэнту.