Палітыка

Сайт Лукашэнкі напісаў, што яго на выбарах падтрымаў Сі Цьзіньпін. Кітайскае агенцтва пра гэта ня піша

Аляксандар Лукашэнка і Сі Цьзіньпін, 2016 год

Кіраўнікі Беларусі і Кітаю 11 чэрвеня правялі тэлефонную размову. Пра яе вынікі ў афіцыйных паведамленьнях у Менску і Пэкіне напісалі па-рознаму.

УЖЫВУЮ Выбары-2020. Як праходзіць прэзыдэнцкая кампанія падчас пандэміі

Фрагмэнт тэксту прэс-службы Аляксандра Лукашэнкі (яго ж публікавала дзяржаўнае інфармацыйнае агенцтва БелТА):

«Сі Цьзіньпін таксама падкрэсьліў, што даўно знаёмы з Аляксандрам Лукашэнкам і вельмі добра інфармаваны аб сытуацыі ў Беларусі, пра тое, што ў краіне ў хуткім часе адбудуцца прэзыдэнцкія выбары. Ён папрасіў перадаць беларускаму народу словы падтрымкі. „Мы вас падтрымліваем, упэўненыя, вы пераможаце, і мы падтрымліваем ваш шлях разьвіцьця“, — сказаў Старшыня КНР».

Фрагмэнт тэксту «Сіньхуа» — афіцыйнай інфармацыйнай агенцыі кітайскага ўраду:

«Кітай рашуча падтрымлівае захады для прафіляктыкі і кантролю эпідэміі, прынятыя ў Беларусі з улікам фактычнай сытуацыі, і гатовы і надалей дзяліцца зь Беларусьсю досьведам барацьбы з эпідэміяй і мэтадамі лячэньня, заявіў Сі Цьзіньпін, выказаўшы ўпэўненасьць у тым, што пад кіраўніцтвам А. Лукашэнкі беларускі народ здолее ў самыя кароткія тэрміны атрымаць перамогу над эпідэміяй».

Другі тэкст не абвяргае першы. Але калі зь першага можна зрабіць выснову, што кіраўнік Кітаю падтрымлівае Лукашэнку на прэзыдэнцкіх выбарах, то з другога зразумела, што падтрымка тычыцца барацьбы з пандэміяй.

ГЛЯДЗІЦЕ ТАКСАМА: Чым падобныя і чым адрозныя Аляксандар Лукашэнка і Сі Цзіньпін

Прэзыдэнцкія выбары — 2020 у Беларусі. Што важна ведаць

  • Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
  • 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
  • Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
  • ЦВК зарэгістраваў 15 ініцыятыўных груп з 55 заявак.
  • Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
  • 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
  • 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
  • 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
  • 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
  • Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.