Аляксандар Лукашэнка 2 чэрвеня сустрэўся са старшынём Менскага гарвыканкаму Анатолем Сіваком, абмеркаваў будаўніцтва раёну «Минск-мир», перанос гістарычнага музэю і магчымасьць будаўніцтва новай лякарні.
Таксама, як піша БелТА, ён «пацікавіўся сытуацыяй у горадзе» і сказаў, што чакае ад Сівака і праваахоўнікаў «поўнага парадку», бо «няймецца некаму». Што адказаў кіраўнік Менску, не паведамляецца. Поўнае відэа пытаньня Лукашэнкі пазьней апублікаваў ананімны Telegram-канал «Пул первого», блізкі да прэс-службы Лукашэнкі:
«Ні ў якім разе нельга перашкаджаць людзям жыць, — казаў Лукашэнка. — Я вось так гляджу на іх: чысьценькія, прыбраныя. Зручны, утульны і прыгожы гарадок (у арыгінале „гарадзішка“. — РС). Можна і зь дзеткамі недзе прагуляцца, і на роварнай дарожцы пракаціцца, і на лыжаролерную трасу схадзіць, і спортам займайся — не хачу. Ды вось жа няймецца некаму!»
Каму «няймецца», не перадаюць ні афіцыйныя, ні неафіцыйныя каналы. Але днём раней Лукашэнка сустракаўся з кіраўніком Камітэту дзяржаўнай бясьпекі і казаў яму, што «Майданаў у Беларусі ня будзе». Ён паабяцаў «нікому не закрываць рот», а для выказваньня пазыцыі прапанаваў ісьці на кухні або на шэсьць «бангалораў».
ГЛЯДЗІЦЕ ТАКСАМА: «Майданаў у Беларусі ня будзе». Лукашэнка сказаў кіраўніку КДБ, што «ведае, адкуль на нас дзьмуць вятры»Сівак: на зборы подпісаў «правакуюць беспарадкі»
Сівак адказаў Лукашэнку, што ў горадзе падчас збору подпісаў за вылучэньне кандыдатаў у прэзыдэнты «фіксуюцца факты, калі мэта ня збор подпісаў, а зусім іншая – каб правакаваць беспарадкі», «абразы гучаць».
«Гэтая сытуацыя знаходзіцца пад нашым жорсткім кантролем і далей будзе кантралявацца, будуць прымацца захады, каб не дапускаць парушэньняў заканадаўства», – паабяцаў Сівак Лукашэнку.
Збор подпісаў якіх прэтэндэнтаў «правакуе беспарадкі», ён не сказаў.
ГЛЯДЗІЦЕ ТАКСАМА: Тры гадзіны ў чарзе, каб аддаць подпіс. Пікеты і затрыманьні 31 траўня. Сьцісла пра галоўнае. ФОТА і ВІДЭАПрэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.