У Маскве пералічылі сьмяротнасьць ад COVID-19 паводле новай мэтодыкі. Лічба вырасла ў 2,5 раза

Колькасьць памерлых з прычыны каранавірусу ў Маскве за красавік, паводле новых дадзеных дэпартамэнту аховы здароўя Масквы, істотна скарэктаваная — з 639 да 1561 чалавека. Пра гэта інфармуе ВВС.

Каранавірус у Беларусі і ў сьвеце. Як разьвіваюцца падзеі >>

Улады расейскай сталіцы ўпершыню ўлічылі бессымптомных пацыентаў у публічнай статыстыцы сьмяротнасьці ад COVID-19.

У мэрыі спасылаюцца на рэкамэндацыі САЗ і Міністэрства аховы здароўя і раяць ужываць новую мэтодыку падліку ў іншых рэгіёнах.

Маскоўскія ўлады ў чацьвер, 28 траўня, упершыню прадставілі дэталёвую статыстыку сьмяротнасьці ад новага каранавірусу. У ёй ўлічылі пацыентаў, у якіх каранавірус пацьвердзіўся толькі на этапе ўскрыцьця.

За красавік агульная сьмяротнасьць у сталіцы склала 11 834 чалавекі, што на 1753 вышэй за сярэдні паказчык за папярэднія тры гады (10 081 чалавек), вынікае з прэзэнтацыі дэпартамэнту аховы здароўя Масквы.

ГЛЯДЗІЦЕ ТАКСАМА: У Маскве дазволілі гуляць «паводле графіку» з 1 чэрвеня, але «рэжым самаізаляцыі» прадоўжаны да 14 чэрвеня

У ёй гаворыцца, што, паводле ўдакладненых зьвестак, за той месяц 636 чалавек памерлі непасрэдна ад новага каранавірусу пры станоўчым тэсьце; яшчэ ў 169 чалавек тэст быў адмоўны, але ускрыцьцё паказала, што прычынай сьмерці стаў менавіта каранавірус.

Яшчэ 756 чалавек у красавіку памерлі ад іншых прычын пры станоўчым тэсьце: зь іх 333 — ад асноўнага захворваньня, абвостранага новым каранавірусам; у 423 каранавірус не паўплываў на зыход хваробы. Яшчэ 192 сьмерці запісаныя ў «невытлумачальнае» перавышэньне статыстыкі.

У мэрыі Масквы сьцьвярджаюць, што сьмяротнасьць ад COVID-19 у горадзе істотна ніжэйшая, чым у заходніх сталіцах — прычым нават у выпадку, калі лічыць яе паводле мэтодыкі САЗ.

ГЛЯДЗІЦЕ ТАКСАМА: Мэр Масквы: Рэальна на COVID-19 хворыя 2% масквічоў

Так, у красавіку выпадкі сьмерці непасрэдна ад каранавірусу ў Маскве складаюць 1,4% ад усіх выяўленых выпадкаў захворваньня. Калі ж дадаць да іх гібель пацыентаў з станоўчым тэстам на вірус, але без сымптомаў пнэўманіі, узровень сьмяротнасьці вырастае да 2,8%.

У Нью-Ёрку і Лёндане гэтыя паказчыкі адпаведна 10% і 23%, вынікае з прэзэнтацыі.

Крыніца ВВС у мэрыі Масквы паведаміла, што падобныя разьлікі апэратыўны штаб цяпер будзе даваць рэгулярна.

На 28 траўня ў Расеі выяўлены 379 051 выпадак заражэньня каранавірусам. За ўвесь пэрыяд зафіксавана 4142 сьмяротныя выпадкі, паправіліся 150 993 чалавекі.

У Маскве зафіксавалі 173 497 выпадкаў заражэньня каранавірусам — 45,7% ад агульнай колькасьці заражаных у краіне. Загінулі ў горадзе 2 254 чалавекі — гэта значыць, сьмяротнасьць склала 1,3%.

Пры пераліку дадзеных паводле новай мэтодыкі, а таксама з прычыны піку эпідэміі ў красавіку, у Расеі можа вырасьці афіцыйная сьмяротнасьць ад каранавірусу, лічаць апытаныя Расейскай службай ВВС крыніцы і экспэрты.