Агулам — 45 сутак. Блогера Ціханоўскага асудзілі яшчэ на 15 сутак арышту

Аўтара YouTube-канала «Страна для жизни» Сяргея Ціханоўскага 19 траўня асудзілі яшчэ на 15 сутак арышту за несанкцыянаваны масавы сход. Такое рашэньне вынес судзьдзя Аляксандар Мохараў у судзе Савецкага раёну Гомля.

На судзе разглядалі два пратаколы па артыкуле 23.34 Кодэксу аб адміністрацыйных правапарушэньнях (парушэньне парадку правядзеньня масавага мерапрыемства). Так міліцыя расцаніла сустрэчы Ціханоўскага з падпісчыкамі ў Салігорску і Мёрах.

Блогера Сяргея Ціханоўскага вядуць на суд

Адвакат падаў хадайніцтва — выклікаць сьведак. Судзьдзя адхіліў яго: «Пратаколы мы маем. Тое, што ёсьць — з тым і будзем працаваць».

Адміністрацыйная справа грунтуецца на рапарце з Салігорскага РАУС. Супрацоўнікі міліцыі зазначылі ў рапарце, што «5 мая пры правядзеньні маніторынгу інтэрнэту заўважылі ролік «Солигорск, встреча с подписчиками», разьмешчаны на youtube-канале «Страна для жизни».

З роліку міліцыянты даведаліся, што Сяргей Ціханоўскі 25 сакавіка «арганізаваў і правёў сход грамадзян», ня маючы на тое дазволу Салігорскага райвыканкаму. Таксама Ціханоўскі «ажыцьцяўляў апытаньне грамадзян, у тым ліку спытаўся ў невядомага грамадзяніна па імені Руслан: „Ці трэба нам зьмена ўлады“ і атрымаў станоўчы адказ». Таксама, паводле рапарту міліцыянтаў, «Ціханоўскі разам зь Няронскім (блогер youtube-канала „Слуцк для жизни“. — РС) абмяркоўвалі карупцыю сярод чыноўнікаў».

У судзе над Сяргеем Ціханоўскім 19 траўня 2020 году

На судзе прадэманстравалі стрым з Салігорску за 25 сакавіка. Ціханоўскі пытаўся ў людзей: «Ці трэба нам зьмена ўлады?». Ягоныя суразмоўцы адказвалі «так» і расказвалі пра свае праблемы.

«Што трэба зьмяніць, каб мы жылі ў краіне для жыцьця?» — пытаўся блогер. «Уладу», — адказвалі чарговыя суразмоўцы з Салігорску.

Адміністрацыйны пратакол быў складзены міліцыяй і ў Мёрах. З рапарту вынікае, што «ў ходзе маніторынгу сеткі Інтэрнэт быў знойдзены ролік «Миоры, город для жизни, общаемся с подписчиками» на youtube-канале «Страна для жизни». На відэа блогер праводзіў «інтэрвію грамадзян, зь якімі абмяркоўваў палітычную і сацыяльную сытуацыю ў краіне», і ў гэтых дзеяньнях ёсьць прыкметы парушэньня артыкула 23.34 КаАП. Міліцыя ў Мёрах склала пратаколы на мясцовых жыхароў, якія ўдзельнічалі ў сустрэчы зь Сяргеем Ціханоўскім. Пра гэта паведамілі на судзе ў Гомлі.

Сяргей Ціханоўскі з адвакатам Алегам Юрчанкам

«Ёсьць рапарт начальніка Мёрскага РАУС, ён правільна дае азначэньне таму, што было: „Ціханоўскі запісвае інтэрвію“. Так яно і было. Я падыходзіў да аднаго чалавека, ішоў, вітаўся, задаваў пытаньне — аднаму чалавеку! У кадры са мной былі па адным чалавеку. У роліку відаць, што я бяру інтэрвію, размаўляю зь людзьмі, не гучыць ніякіх заклікаў — які гэта мітынг?» — казаў на судзе Сяргей Ціханоўскі.

Ён патлумачыў судзьдзі, як робяцца ролікі. «А калі гэта мантаж? А калі гэта сумясьцілі — розныя ролікі і сюжэты? А калі гэта актор у кадры? А калі робяць мантаж, спэцэфэкты?», — казаў блогер.

Ён зьвярнуў увагу, што міліцыя ў пратаколах пазначыла дату зьдзяйсьненьня правапарушэньня тым днём, у які быў разьмешчаны ролік на youtube-канале. «Зьняць можна было калі заўгодна, і выкласьці ў інтэрнэт у любы час — як гэта можна пазначаць датай зьдзяйсьненьня правапарушэньня? Ніякіх мітынгаў я не праводзіў. Калі я зраблю хоць адзін мітынг — вы яго ні з чым не паблытаеце, запэўніваю вас!», — сказаў на судзе блогер.

Паводле ягоных слоў, кваліфікаваць размову зь людзьмі як мітынг — «верх крывадушнасьці». «Гэтаксама можна расцаніць і чаргу, дзе стаяць і размаўляюць людзі, і сход сяброў жыльлёва-камунальнага каапэратыву», — сказаў Сяргей і прасіў суд вынесьці «адзінае справядлівае рашэньне» і апраўдаць яго па пратаколах.

Адвакат Алег Юрчанка таксама прасіў суд апраўдаць ягонага падабароннага, бо ў яго дзеяньнях няма складу правапарушэньня.

Што здарылася?

Пасьля двух дзён перасьледу 6 траўня міліцыя затрымала Сяргея Ціханоўскага ў Магілёве паводле пастановы суду Савецкага раёну Гомля аб адміністрацыйным арышце.

Па дадзеных праваабаронцаў «Вясны», Сяргея Ціханоўскага асудзілі на 15 сутак яшчэ 10 студзеня 2020 году за ўдзел у акцыі супраць інтэграцыі з Расеяй 20 сьнежня. Але адбываць гэты 15-суткавы арышт тады яго не адправілі, а адпусьцілі на волю пасьля 15-суткавага арышту, прысуджанага раней. Пастанова аб арышце блогера ўступіла ў законную сілу 15 студзеня. Па законе ва ўладаў быў год, каб накіраваць Сяргея Ціханоўскага адбываць арышт.

Ужо 13 дзён Ціханоўскі ў ізалятары часовага ўтрыманьня ў Гомлі. Адтуль 18 траўня яго прывозілі на судовае паседжаньне, на якім прысудзілі яшчэ 15 сутак арышту.

9 траўня Ціханоўскі з падпісчыкамі плянаваў правесьці ў Бабруйску «АнтыПарад» — акцыю пратэсту супраць параду ў Менску падчас пандэміі каранавірусу.

15 траўня Цэнтральная выбарчая камісія Беларусі адмовіла ў рэгістрацыі ініцыятыўнай групы па вылучэньні кандыдатам у прэзыдэнты Сяргея Ціханоўскага. Прычына: блогер нібыта няправільна аформіў дакумэнты, на заяве няма ягонага подпісу. Дакумэнты на рэгістрацыю ініцыятыўнай групы падавала ягоная жонка Сьвятлана Ціханоўская на падставе даверанасьці, атрыманай яшчэ ў студзені гэтага году.

ГЛЯДЗІЦЕ ТАКСАМА: Чаму Ціханоўскага і каманду Статкевіча не дапусьцілі нават да збору подпісаў ГЛЯДЗІЦЕ ТАКСАМА: Рэгістрацыя ініцыятыўных групаў: бунтароў адсеялі адразу

Тады ў ініцыятыўнай групе Ціханоўскага вырашылі зарэгістраваць ініцыятыўную групу для вылучэньня кандыдатам у прэзыдэнты ягонай жонкі — Сьвятланы Ціханоўскай.

ГЛЯДЗІЦЕ ТАКСАМА: Ініцыятыўная група блогера Ціханоўскага вырашыла падаваць дакумэнты на вылучэньне кандыдатам ягонай жонкі

Хто такі Сяргей Ціханоўскі

Відэаблогера Сяргея Ціханоўскага затрымалі 6 траўня пасьля двух дзён міліцэйскага перасьледу. На наступны дзень на ягоным Youtube-канале выйшла відэа, на якім Ціханоўскі гаворыць пра намер стаць кандыдатам у прэзыдэнты Беларусі.

Дзясяткі чалавек у розных гарадах Беларусі былі затрыманыя і асуджаныя за акцыі ў падтрымку Сяргея Ціханоўскага.

Затрыманьні падчас акцыі ў Гомлі ў падтрымку Ціханоўскага, 7 траўня

Што пра яго вядома:

• яму 41 год, жыве ў Гомлі, жанаты, мае дзяцей;
• мае Youtube-канал з амаль 150 тысячамі падпісчыкаў, самае папулярнае відэа на ім мае 719 тысяч праглядаў;
• на канале ён крытыкуе беларускія ўлады і расказвае аб праблемах жыхароў розных рэгіёнаў Беларусі; пэрыядычна ладзіць сустрэчы з падпісчыкамі;
• выступае за пашырэньне мясцовага самакіраваньня ў Беларусі;
• у сакавіку сабраў за адзін стрым 1600 даляраў на арэнду аўтадома, на якім пачаў езьдзіць у розныя гарады на запрашэньне падпісчыкаў;
• ня раз браў удзел у палітычных акцыях пратэсту і быў караны ўладамі за гэта, у тым ліку правёў Новы год за кратамі за ўдзел у акцыях супраць «паглыбленьня інтэграцыі» Беларусі і Расеі;
• да таго, як заняўся блогам «Страна для жизни», здымаў рэкляму і музычныя кліпы са сваёй студыяй вытворчасьці відэакантэнту «Компас» (казаў журналістам, што сам больш не займаецца гэтым, але кампанія працуе), купляў «кулацкі дом» у вёсцы пад Гомлем і зьбіраўся зрабіць там гатэль;
• раней меркаваў стаць адным з «кандыдатаў пратэсту» Міколы Статкевіча.