Пра рашэньне перанесьці Алімпіяду на лета 2021 году было вядома за 7 дзён да таго, як Белтэлерадыёкампанія разьмясьціла тэндэр для закупу абсталяваньня.
24 сакавіка Алімпіяду ў Токіё вырашылі перанесьці з прычыны пандэміі каранавірусу на лета 2021 году. Гэтую інфармацыю з пацьверджаньнем ад Нацыянальнага алімпійскага камітэту ў гэты дзень апублікавала BBC.
31 сакавіка Белтэлерадыёкампанія разьмясьціла тэндэр для закупу абсталяваньня, каб асьвятляць Алімпіяду ў Токіё.
«Набыцьцё тэлевізійнага абсталяваньня для асьвятленьня Алімпіяды ў Токіё 2020 году», — тэндэр з такой назвай разьмешчаны на сайце дзяржзакупаў 31 сакавіка. Абсталяваньне набывае Белтэлерадыёкампанія за 46 789 рублёў.
Паводле тэхнічнага апісаньня, абсталяваньне патрэбнае, каб арганізаваць на Алімпіядзе эфірную апаратную — гэта сэрвэры, маніторы, электронныя носьбіты інфармацыі. У іншы час, калі няма Алімпіяды, абсталяваньне мае выкарыстоўвацца для «арганізацыі спартовых трансьляцый».
Сродкі, паводле заяўкі, — бюджэтныя, закуп не адменены. Аўкцыён прызнаны сапраўдным, тэрміны пастаўкі абсталяваньня — з 14 траўня па 12 ліпеня.
ГЛЯДЗІЦЕ ТАКСАМА: Кіраўнік Мэдычнай асацыяцыі Японіі: правесьці Алімпіяду без вакцыны будзе цяжка
Белтэлерадыёкампанія: «Гэта абсталяваньне для новага павільёну, які запусьціцца ў верасьні»
У Белтэлерадыёкампаніі карэспандэнту Свабоды сказалі, што «набыцьцё плянавалася яшчэ ў студзені», калі не было вядома пра перанос Алімпіяды. І папрасілі даць афіцыйны камэнтар цалкам, без скарачэньняў:
«Набыцьцё дадзенага абсталяваньня зьдзяйсьняецца для тэхнічнага абсталяваньня апаратнай частцы студыйнага павільёна спартовага тэлеканала „Беларусь-5“, запуск якога заплянаваны на верасень. А перад усталяваньнем для працы ў штатным рэжыме ў сыстэме Белтэлерадыёкампаніі камплект тэлевізійнага абсталяваньня, які закупляецца, плянавалася выкарыстоўваць для асьвятленьня мерапрыемстваў Алімпійскіх гульняў у Токіё.
І гэта традыцыйная практыка ў працы мэдыяхолдынгу: так было, напрыклад, і з набыцьцём 4-х ПТС (перасоўная тэлевізійная станцыя), якія Белтэлерадыёкампанія набывала перад Другімі Эўрапейскімі гульнямі ў Менску, каб ня проста аднаразова асьвяціць мерапрыемствы форуму, але і ў далейшым выкарыстоўваць іх у штатным рэжыме на іншых мерапрыемствах.
ГЛЯДЗІЦЕ ТАКСАМА: Алімпійскі чэмпіён Шчэрба: Калі людзі пачнуць паміраць сем'ямі, прэзыдэнт задумаеццаПаколькі Алімпіяда перанесеная на наступны год, то сёлета абсталяваньне будзе адразу ўсталяванае па месцы сваёй асноўнай эксплюатацыі, а ў далейшым адпрацуе на Алімпіядзе. Адзначу таксама, што працэдура набыцьця дадзенага абсталяваньня была пачатая яшчэ ў студзені, задоўга да таго, калі афіцыйна стала вядома, што Алімпіяда не адбудзецца, а менавіта — 30 сакавіка. Гэта да пытаньня аб тым, чаму на сайце дзяржзакупаў яно было прадстаўлена як „абсталяваньне для Алімпіяды“.
Паколькі сама працэдура закупу займае не адзін месяц, немэтазгодна адклікаць заяўку і спыняць таргі, каб памяняць назву аўкцыёну», — паведаміла прэс-сакратарка Белтэлерадыёкампаніі Сьвятлана Смалонская-Краскоўская.
На што б хапіла гэтых грошай
46 789 рублёў — глядзім, на што б хапіла гэтай сумы ва ўмовах, калі на дапамогу мэдыкам скідаюцца людзі з усёй Беларусі.
- 31 192 — масак
- 5198 — рэсьпіратараў трэцяга ўзроўню засьцярогі
- 71 983 — пар пальчатак
- 22 823 — мэдычных халатаў
- ШВЛ — больш за палову кошту аднаго апарата