Удзельнікі незалежнай кампаніі «Праваабаронцы за свабодныя выбары» накіравалі 29 красавіка ў Цэнтарвыбаркам, Палату прадстаўнікоў і Вярхоўны суд Беларусі прапановы наконт правядзеньня прэзыдэнцкіх выбараў, якія павінны адбыцца не пазьней за 30 жніўня.
Праваабаронцы канстатантавалі патэнцыйную небяспеку для здароўя людзей у працэдурах, якія прадугледжваюць непасрэдны кантакт, а тым больш знаходжаньне ў адным месцы як у памяшканьні, так і на адкрытым паветры. Яны мяркуюць, што ўспрыманьне гэтай небясьпекі будзе перашкодай для свабоднага ўдзелу грамадзянаў у выбарчым працэсе і прывядзе да зьніжэньня легітымнасьці выбараў.
ГЛЯДЗІЦЕ ТАКСАМА: Лукашэнка перанёс штогадовае пасланьне народу з прычыны «каранапсыхозу», паабяцаў новую КанстытуцыюНа падставе гэтага праваабаронцы прапанавалі органам заканадаўчай і выканаўчай улады распрацаваць комплекс захадаў, якія гарантуюць бясьпечнае ажыцьцяўленьне выбарчых правоў грамадзянаў бязь іх непрапарцыйнага абмежаваньня ва ўмовах пандэміі.
«Праваабаронцы за свабодныя выбары» прапанавалі дэпутатам Палаты прадстаўнікоў унесьці ў Выбарчы кодэкс зьмены ў артыкулы, якія б замацоўвалі парадак дачы згоды выбарнікам аб вылучэньні асобы кандыдатам у прэзыдэнты шляхам дыстанцыйнага выказваньня згоды:
- праз пошту
- праз электронную пошту
- праз службу кароткіх паведамленьняў апэратараў мабільнай сувязі
- праз электронную перадачу выявы запоўненага падпіснога ліста.
Цэнтарвыбаркаму прапанавана пры распрацоўцы пастановаў, якія рэгулююць асобныя этапы выбарчага працэсу, улічваць небясьпекі распаўсюду COVID-19.
Вярхоўнаму суду Беларусь прапанавана забясьпечыць магчымасьць разгляду выбарчых спрэчак з дапамогай элементаў электроннага судаводзтва.
«Праваабаронцы за свабодныя выбары» зьвярнулі ўвагу, што правядзеньне свабодных і справядлівых выбараў зьвязанае з імплемэнтацыяй у выбарчае заканадаўства рэкамэндацый АБСЭ, большасьць якіх можа быць рэалізавана праз пастановы Цэнтарвыбаркаму.
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ