Дактары Капыльскай лякарні знаходзяцца на двухтыднёвым карантыне, яны будуць жыць на працы. Пра гэта «Нашай ніве» паведаміў галоўны доктар Капыльскай раённай лякарні Сяргей Пацяйковіч. Ён патлумачыў, што гэта робіцца ў мэтах прафіляктыкі.
Пры гэтым Пацяйковіч зазначыў, што ня ўсе дактары знаходзяцца на карантыне. Пра сытуацыю з каранавірусам галоўны лекар шпіталя адмовіўся гаварыць.
29 сакавіка мэдработнікі ў касьцюмах спэцабароны наведваліся ў хаты жыхароў Новых Доктаравічаў, Доктаравічаў і Вуглоў. Пасьля гэтага некалькіх чалавек забралі ва ўстановы Менску, Барысава і Капыля.
Капыльская раённая лякарня да 20 красавіка спыніла плянавыя мэдыцынскія агляды. Сайт мясцовай раённай газэты «Слава працы» нічога не паведамляе пра сытуацыю з каранавірусам у рэгіёне.