Абразы можна не цалаваць. Праваслаўная царква ўвяла правілы для прафіляктыкі каранавірусу

Мітрапаліт Менскі і Заслаўскі Павел вызначыў шэраг правілаў, накіраваных на прадухіленьне распаўсюду эпідэміі COVID-19 у праваслаўных храмах.

Правілы пералічаныя ў лісьце, тэкст якога апублікавалі на інфармацыйным партале sobor.by.

У прыватнасьці, праваслаўны ярарх загадаў арганізаваць абавязковае дзяжурства царкоўных работнікаў каля разьмешчаных перад іканастасам аналояў, а таксама ківотаў. Дзяжурным належыць праціраць абразы і сьвятыні вадкасьцямі на сьпірце ці іншымі антысэптыкамі «пасьля кожнага цалаваньня вернікамі». Пры гэтым мітрапаліт Павел лічыць магчымым на пэрыяд эпідэміі ўстрымацца ад цалаваньня сьвятынь і замяніць яго паклонам.

ГЛЯДЗІЦЕ ТАКСАМА: Пакутны тыдзень: Папскія службы пройдуць за зачыненымі дзьвярыма

Сьвятарам рэкамэндавана ўстрымацца ад дабраславеньня з цалаваньнем рукі. У храмах варта разгледзець магчымасьць прымяняць аднаразовыя кубачкі для запіваньня пасьля прычашчэньня альбо зусім адмовіцца ад запіваньня. У першым выпадку аднаразовы посуд неабходна сабраць і ўтылізаваць адразу пасьля службы.

Настаяцелем прыходаў і манастыроў загадана сачыць за захаваньнем чысьціні і санітарыі, а таксама за рэгулярнасьцю вільготнай прыборкі, у тым ліку з антысэптыкамі, у месцах збору людзей. Акрамя гэтага, яны павінны нагадваць людзям пра асабістую адказнасьць за сваё здароўе і перад навакольнымі, а таксама рэкамэндаваць прыхаджанам у выпадку недамаганьня або прыкмет віруснай інфэкцыі неадкладна зьвяртацца да лекара і ўстрымацца ад удзелу ў грамадзкай царкоўнай малітве да поўнага ачуньваньня.

ГЛЯДЗІЦЕ ТАКСАМА: Расейскія вернікі каранавірусу не баяцца ВІДЭА

Апроч іншага, загадана ў прамежках паміж хрышчэньнямі дэзынфікаваць купель, падчас мірапамазаньня або памазаньня алеем выкарыстоўваць аднаразовыя ватныя палачкі, якія пасьля неабходна спальваць. Да асаблівага распараджэньня прыпынілі працу нядзельных школ, прыходзкіх сэкцый і гурткоў.

ГЛЯДЗІЦЕ ТАКСАМА: У беларускіх касьцёлах забаранілі цалаваць абразы і акрапляць сьвятой вадой

На мінулым тыдні Сьвяты Сынод РПЦ прыняў заяву, у якой заклікаў вернікаў ня ставіцца легкадумна да каранавіруснай інфэкцыі, прытрымлівацца прадпісаньняў лекараў і выконваць меры прафіляктыкі. Праваслаўе і каталіцызм — дзьве найбольш распаўсюджаныя хрысьціянскія канфэсіі ў Беларусі, якія аб’ядноўваюць разам каля 6 млн чалавек.

На сёньня ў Беларусі зафіксавана 36 выпадкаў каранавірусу. Трое паправіліся і выпісаныя дадому. Адзін пацыент знаходзіцца ў стане сярэдняй ступені цяжкасьці. Астатнія адчуваюць сябе здавальняюча.