Праваабаронцы «Вясны» зьвярнуліся да спэцдакладчыкаў ААН па сытуацыі полацкага актывіста Алеся Круткіна, які адбывае 45 сутак запар за менскую акцыю пратэсту супраць паглыбленьня інтэграцыі 20 сьнежня, а таксама за расклейваньне ўлётак у Віцебску, паведамляе сайт праваабарончага цэнтру.
Звароты накіравалі адразу да трох спэцыяльных дакладчыкаў ААН:
- у пытаньні аб праве на свабоду мірных сходаў і асацыяцыяў;
- у пытаньні аб заахвочваньні і абароне права на свабоду думак і іх свабоднае выказваньне;
- у пытаньні аб стане ў галіне правоў чалавека ў Беларусі.
Праваабаронцы адзначаюць, што Круткіна пазбавілі волі менавіта за рэалізацыю права на свабоднае выказваньне думкі і на свабоду сходаў.
ГЛЯДЗІЦЕ ТАКСАМА: Віцебскаму актывісту Круткіну далі 45 сутак арышту. Чаму так шмат?У зваротах яны гавораць пра неабходнасьць прыняць тэрміновыя захады для вызваленьня Круткіна, які ўжо правёў за кратамі 30 дзён, а таксама не дапусьціць выкананьня судовых рашэньняў аб арышце:
- Дзьмітрыя Казлова (блогер Шэры Кот) (засталося адбыць 94 дні),
- сустаршыні партыі БХД Паўла Севярынца (засталося адбыць 30 сутак),
- блогера Сяргея Ціханоўскага (засталося адбыць 15 сутак),
- актывіста «Маладога фронту» Максіма Ўрбановіча (засталося адбыць 15 сутак),
- а таксама лідэра руху салідарнасьці «Разам» Вячаслава Сіўчыка (павінен адбыць 45 сутак).
Цягам сьнежня і пачатку студзеня ў гарадах Беларусі прайшлі 202 суды за акцыі пратэсту супраць паглыбленай інтэграцыі з Расеяй. Агульная сума штрафаў, якія прысудзілі 132 актывістам, — каля 65 тысяч даляраў.
Апроч штрафаў, актывістам прысуджалі суткі, — агулам больш за год, ці 375 сутак арышту. «Чэмпіёнам» стаў аршанскі блогер Дзьмітры Казлоў (вядомы пад псэўданімам Шэры Кот), агулам ён атрымаў 120 сутак арышту.
«Паглыбленьне інтэграцыі» Беларусі і Расеі. Што важна ведаць
Аляксандар Лукашэнка і Ўладзімір Пуцін, ліпень 2019
- Урады Беларусі і Расеі зьбіраліся ўзгадніць 31 стратэгічны плян інтэграцыі. Паволе расейскага прэм’ер-міністра Дзьмітрыя Мядзьзведзева, няўзгодненым застаўся 1 плян — пра наднацыянальныя органы.
- Што менавіта зьбіраюцца падпісаць Лукашэнка і Пуцін, а таксама на што пагадзіліся ўрады ў стратэгічных плянах, публічна не агучваецца.
- Тэма «паглыбленьня інтэграцыі» пачалася зь перамоваў пра кампэнсацыю «падатковага манэўру». Але ў «праграме інтэграцыі» няма кампэнсацыі «падатковага манэўру», бюджэт разьлічылі безь яе.
- У канцы 2018 году Мядзьведзеў заявіў, што Расея гатовая «праводзіць адзіную палітыку ў галіне падаткаў, цэна- і тарыфаўтварэньня» толькі тады, калі будуць выкананыя ўмовы пагадненьня аб «саюзнай дзяржаве» 1999 году — а гэта агульныя валюта, суд і мытня.
- Гэтыя ўмовы празвалі «ўльтыматумам Мядзьведзева». Аляксандар Лукашэнка тады адказаў жорстка: маўляў, «шантажаваць марна. Разумею намёкі — уступайце ў склад Расеі. Гэтага ня будзе ніколі».
- 19 сьнежня 2019 году Ўладзімір Пуцін заявіў, што зь Беларусьсю абмяркоўваюць стварэньне наднацыянальных органаў — кантрольнага і эмісійнага. 23 сьнежня Мядзьведзеў паўтарыў, што без наднацыянальных органаў ня будзе кампэнсацыі «падатковага манэўру» і іншай дапамогі Беларусі.
- 17 лістапада Лукашэнка абурыўся тым, што расейцы «кожны раз падсоўваюць новыя ўмовы, у выніку мы ў эканоміцы нешта страчваем», і рытарычна спытаў: «На храна патрэбен такі саюз?».
- Шэраг беларусаў лічаць, што «паглыбленьне інтэграцыі» ўсё ж можа прывесьці да страты незалежнасьці Беларусі. Палітыкі і культурныя дзеячы прынялі 1 сьнежня сумесную заяву «Аб пагрозе Незалежнасьці Беларусі», а 4 сьнежня супраць інтэграцыі выступілі беларускія Telegram-каналы і суполкі «Ўкантакце».
- Акцыі супраць паглыбленьня інтэграцыі Беларусі і Расеі прайшлі ў Менску 7, 8, 20 і 21 сьнежня. А таксама ў Горадні, Пінску, Лідзе. За мяжой — у Польшчы, Украіне, Літве, Чэхіі, Вугоршчыне, Бэльгіі, Ізраілі, ЗША, Канадзе.
-
Агульная сума штрафаў пратэстоўцам — каля 65 тысяч даляраў. Таксама ўдзельнікам акцый прысудзілі агулам 375 сутак арышту.
- 24 сьнежня ў інтэрвію «Эхо Москвы» Лукашэнка заявіў, што акцыі супраць «паглыбленьня інтэграцыі» не былі масавымі («400 чалаек — гэта наша ядро апазыцыі»), і «нехта падказаў, аплаціў, фонды ім даюць прыстойныя грошы». Лукашэнка дадаў, што сам ня пойдзе на тое, «ад чаго яны спрабуюць усьцерагчы беларускі народ», і назваў сябе «галоўны абаронца сувэрэнітэту і незалежнасьці».
Спэцпрапект «Чаму Беларусь не Расея»