У кампаніі «Гудс фром Чайна» не выключаюць, што праз каранавірус праца з Кітаем можа спыніцца на пэўны тэрмін.
Дырэктар ТАА «Гудс фром Чайна» Віталь Белавус сказаў карэспандэнту Свабоды, што за апошнія два-тры тыдні попыт на замовы з Кітаю паменшыўся амаль на 70%. Кампанія ўжо 10 гадоў супрацоўнічае з Кітаем і Ганконгам, а таксама зь іншымі краінамі.
Віталь Белавус
«У чаканьнях я настройваюся на горшае, ажно да спыненьня працы з Кітаем на пэўны тэрмін. Магчыма, сёлета гэты кірунак і прыпынім, то бо ня будзем браць новых замоваў, пакуль сытуацыя не стабілізуецца. Прагнозаў і спадзеваў, што каранавірусу хутка дадуць рады, няма», — кажа Віталь Белавус.
Таксама ўзьніклі яўныя праблемы з пастаўкамі ўжо замоўленых тавараў з Кітаю.
ГЛЯДЗІЦЕ ТАКСАМА: Пандэмія каранавірусу ў Беларусі і ў сьвеце. Як разьвіваюцца падзеі«З Кітаем мы працуем на ўмовах перадаплаты. Замоўца аплочвае каля 30% ад цаны, гэта першая авансавая плата. Ёсьць высокая імавернасьць, што замоўца застанецца без тавару і безь вяртаньня гэтых грашовых сродкаў. Вось гэта самыя яўныя страты. Альбо выплата гэтых перадаплатаў расьцягнецца на няпэўны тэрмін», — мяркуе Віталь Белавус.
Гэта тычыцца і тавараў лёгкай прамысловасьці і абсталяваньня. Беларускія заказчыкі баяцца няпэўнасьці з кітайскага боку. А кітайскі бок тлумачыць затрымкі з пастаўкамі форс-мажорам праз эпідэмію, спыненьне працы заводаў і фабрык.
ГЛЯДЗІЦЕ ТАКСАМА: «Ні гвалту, ні шуму, ні пылу». Лукашэнка ня верыць, што закрытыя межы ўратуюць ад каранавірусу«Як далей будуць разьвівацца падзеі, пакуль складана сказаць. З аднаго боку, яны нібыта і не адмаўляюцца ад абавязаньняў, зь іншага боку — не сьпяшаюцца іх выконваць. Да таго ж падчас кітайскага Новага году яны ўсе былі на выходных», — апавядае дырэктар «Гудс фром Чайна».
У кампаніі ня бачаць магчымасьці пераарыентавацца на іншыя рынкі, бо «хутка гэта зрабіць немагчыма, няма альтэрнатывы, гэта занадта вялікі рынак паставак».
ГЛЯДЗІЦЕ ТАКСАМА: Дзе ў Беларусі праверыцца на каранавірусНа прадпрыемстве «Белджы» ад камэнтароў праз тэлефон адмовіліся, як і ў «БелАЗ-холдынгу», які мае 58,2% акцыяў гэтага прадпрыемства.
Таксама не пракамэнтавалі сытуацыю турыстычныя фірмы. Хаця 24 лютага Міністэрства аховы здароўя і Міністэрства спорту і турызму рэкамэндавалі беларусам устрымацца ад паездак на поўнач Італіі праз каранавірус.
ГЛЯДЗІЦЕ ТАКСАМА: БНТУ перавядуць на індывідуальнае навучаньне. Рэктар — пра каранавірус у студэнта. ВІДЭАШто трэба ведаць пра новы каранавірус з Кітаю
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ