Падчас выступу на VIII зьезьдзе Фэдэрацыі прафсаюзаў Беларусі Аляксандар Лукашэнка выказаў занепакоенасьць ростам цэн на прадукты харчаваньня ў краіне.
«Што да прадуктаў харчаваньня, насьцярожваюць дадзеныя, што ўжо за сёлетні студзень цэны вырасьлі больш чым на 1%. Таксама практычна на працягу году пастаянна даражэе малочная прадукцыя. Ідыятызм поўны. Малако падзець няма куды, а ў нас цэны ўвесь час растуць», — цытуе Лукашэнку ягоная прэс-служба.
Лукашэнка паабяцаў неўзабаве «падвесьці вынік усёй гэтай валтузьні з цэнамі» і выказаў думку, што, магчыма, ў Беларусі вернуцца да сьпісу 20 асноўных сацыяльна значных прадуктаў, цэны на якія будуць рэгулявацца на дзяржаўным узроўні.
ГЛЯДЗІЦЕ ТАКСАМА: Калі плян па інфляцыі праваліцца, на гэтыя тавары будуць рэгуляваць цэны«У нас сёньня ўсе кінуліся ў гандаль. Чаму? Там добра жывецца. І вы ведаеце, як там гандлююць. Нічога, не зьбяднеюць, калі патрымаюць цэны на 20 сацыяльна значных прадуктаў харчаваньня», — сказаў Лукашэнка.
На думку Лукашэнкі, прафсаюзы павінны разам з Камітэтам дзяржаўнага кантролю ўзяцца і «вырашыць гэтую праблему» з ростам цэнаў на прадукты.
ГЛЯДЗІЦЕ ТАКСАМА: Нацбанк: рэгуляваныя цэны растуць хутчэй за свабодныяУ 2016 годзе са сьпісаў «сацыяльна значных тавараў», цэны на якія рэгулявала Міністэрства гандлю, выключылі ўсе пазыцыі — каб зьнізіць адміністрацыйнае рэгуляваньне цэнаўтварэньня. З гэтага часу міністэрства можа рэгуляваць цэны на гэтыя тавары толькі пры неабходнасьці для «выключэньня значнага росту цэнаў пры ажыцьцяўленьні аналізу сытуацыі на харчовым рынку» і толькі 90 дзён на год. Сьпіс тавараў нязьменны з 2014 году, цалкам ён апублікаваны тут.
У жніўні 2019 году сьпіс «сацыяльных» тавараў пашырылі. Да сьпісу дадалі пшанічны хлеб, батоны з пшанічнай мукі, цьвёрды і паўцьвёрды сыр, чорную гарбату, бульбу, буракі, моркву, капусту, цыбулю, агуркі, памідоры, манныя і прасяныя крупы, мясныя буйнакавалкавыя паўфабрыкаты і водрубы, вараныя каўбасы, сасіскі і сардэлькі.
Раней цэны на бульбу, буракі, моркву, капусту і цыбулю маглі рэгуляваць абласныя выканкамы і Менгарвыканкам, цяпер у іх гэтыя паўнамоцтвы адабралі.
ГЛЯДЗІЦЕ ТАКСАМА: Цэны на яблыкі, сыр, сасіскі і батоны зможа рэгуляваць Мінгандлю ГЛЯДЗІЦЕ ТАКСАМА: Даручэньне Лукашэнкі па грэчцы пачалі выконваць: гандлёвыя надбаўкі абмяжуюць