Сярод загінулых у катастрофе самалёта Boeing 737 «Міжнароднай авіякампаніі Ўкраіны» ў Тэгеране было найбольш грамадзян Ірану і Канады, заявіў міністар замежных спраў Украіны Вадзім Прыстайка.
Паводле Прыстайкі, на борце рэйсу PS752, які вылецеў каля 6.10 8 студзеня маршрутам Тэгеран — Кіеў, знаходзіліся грамадзяне наступных краінаў:
- Іран — 82 чалавекі;
- Канада — 63;
- Украіна — 2 + 9 (экіпаж);
- Швэцыя — 10;
- Аўганістан — 4;
- Нямеччына — 3;
- Вялікая Брытанія — 3.
Наразі нам відома наступна інформація щодо країн походження загиблих в катастрофі #PS752:Іран - 82;Канада - 63;Україна - 2 + 9(екіпаж);Швеція - 10;Афганістан - 4;ФРН - 3;Велика Британія - 3.Висловлюємо наші співчуття. Українська влада продовжує розслідування.
— Vadym Prystaiko (@VPrystaiko) January 8, 2020
Што вядома пра катастрофу на момант публікацыі:
- Самалёт Boeing 737-800 NG (рэйс PS752, рэгістрацыйны нумар UR-PSR) вылецеў каля 6.10 8 студзеня маршрутам Тэгеран — Кіеў, зьнік з радараў празь некалькі хвілінаў пасьля ўзьлёту.
- Усе на борце загінулі. На рэйс купілі квіткі 168 чалавек, але, паводле папярэдніх зьвестак, на борце было 167 пасажыраў, а таксама 9 чальцоў экіпажу.
ГЛЯДЗІЦЕ ТАКСАМА: Украінскі самалёт са 176 людзьмі разьбіўся ў Іране
- МАУ пакуль не публікуе сьпісы загінулых. Пазьней — як абяцаюць, да канца дня — сьпісы зьявяцца на афіцыйным сайце авіякампаніі. Цяпер МАУ зьвязваецца са сваякамі загінулых, «аказвае ўсю магчымую дапамогу».
- Паводле папярэдніх зьвестак іранскага боку, самалёт разьбіўся з тэхнічных прычынаў, якія прывялі да аварыі рухавіка. МАУ перадае, што цяпер вэрсіі тэракту або ракетнай атакі выключаюцца. У інтэрнэце ж распаўсюджваюцца розныя чуткі пра магчымую сувязь катастрофы з канфліктам Ірану і ЗША — ніякіх афіцыйных заяваў пра такую сувязь не было. Расьсьледаваньне маюць правесьці ўлады Ўкраіны і Ірану, кампанія Boeing. МАУ супрацоўнічае з украінскімі ўладамі, каб высьветліць прычыны катастрофы.
- Самалёт быў выраблены ў 2016 годзе, атрыманы МАУ непасрэдна з заводу Boeing, апошні раз прайшоў плянавае тэхнічнае абслугоўваньне 6 студзеня 2020 году. МАУ заяўляе, што гарантуе спраўнасьць сваіх самалётаў і высокую кваліфікацыю пілётаў.