Ацэначная місія Бюро дэмакратычных інстытутаў і правоў чалавека (БДІПЧ) Арганізацыі бясьпекі і супрацы ў Эўропе (АБСЭ), якая прызнаецца найбольш кваліфікаванай і дасьведчанай у справе правядзеньня выбараў, 26 жніўня прылятае ў Беларусь.
Пра гэта Свабодзе паведаміла старшыня Цэнтральнай выбарчай камісіі Лідзія Ярмошына.
ЦВК прагназуе высокі ўзровень назіральнікаў
«Гэта стандартная працэдура. Місія наведвае краіну, у якой зьбіраюцца праводзіць выбары. Адбываюцца розныя сустрэчы. Пасьля чаго экспэрты вяртаюцца ў Варшаву, дзе месьціцца галоўны офіс БДІПЧ, і дакладаюць там сытуацыю. Паводле іх справаздачы бюро і прымае рашэньне, пасылаць сваіх назіральнікаў на выбары альбо не. Тады ж абмяркоўваецца і колькасьць назіральнікаў: доўгатэрміновых і кароткатэрміновых», — патлумачыла Ярмошына.
Яна выказала меркаваньне, што ўзровень назіральнікаў БДІПЧ на выбарах у Палату прадстаўнікоў будзе высокі. Найхутчэй, іх ачоліць намесьнік кіраўніка Бюро. Сёньня ж міністар замежных спраў Беларусі Ўладзімер Макей заявіў, што Беларусь згодная прыняць назіральнікаў БДІПЧ у любой колькасьці. «Мы не зьбіраемся абмяжоўваць іх колькасьць», — адзначыў кіраўнік зьнешнепалітычнага ведамства.
ГЛЯДЗІЦЕ ТАКСАМА: Правацэнтрысцкая кааліцыя патлумачыла, навошта ідзе на выбары ў Палату прадстаўнікоўШто адзначаў БДІПЧ на ранейшых выбарах
Яшчэ ніводнага разу БДІПЧ не прызнаў прэзыдэнцкія і парлямэнцкія выбары ў Беларусі (на мясцовыя экспэрты ня езьдзяць) цалкам адпаведнымі дэмакратычным стандартам.
Так, у справаздачы аб папярэдніх (верасень 2016 году) выбарах у Палату прадстаўнікоў назіральнікі Бюро адзначалі, што шэраг даўніх сыстэмных недахопаў ня вырашаны. Заканадаўства абмяжоўвае палітычныя правы і асноўныя свабоды і носіць празьмерна абмежавальны характар.
На выбарах назіралася агульнае павелічэньне колькасьці кандыдатаў, у тым ліку ад апазыцыі, але ў цэлым выбарчая кампанія была мала прыкметная, адзначае БДІПЧ.
Склад выбарчых камісій ня быў плюралістычны, што падрывае ўпэўненасьць у іх незалежнасьці, падкрэсьліваецца ў дакумэнце. У склад камісій уключылі толькі нязначную колькасьць прадстаўнікоў апазыцыі. Працэсы галасаваньня, падліку галасоў і зьвядзеньня вынікаў «былі азмрочаныя значнай колькасьцю парушэньняў і адсутнасьцю празрыстасьці».
ГЛЯДЗІЦЕ ТАКСАМА: Пад Менскам выявілі электаральныя анклявы. Ці гэта законна?