Берасьцейскі райвыканкам забараніў правядзеньне шасьці мітынгаў супраць акумулятарнага заводу. Яны плянаваліся 20-25 жніўня на стадыёне дзіцяча-юнацкай спартыўнай школы «Прыбужжа» у вёсцы Тэльмы, вызначаным для масавых мерапрыемстваў.
Як паведаміў БелаПАН заяўнік акцый Раман Кісьляк, у сваім адказе мясцовая ўлада напісала, што правядзеньне мітынгаў недапушчальна ў сувязі з правядзенем рамонтных працаў на стадыёне.
«Нам забаранілі ўжо 23 мітынгі супраць акумулятарнага заводу на гэтай пляцоўцы з-за рамонту, — зазначыў праваабаронца. — Як паказвае наш маніторынг, на стадыёне ў пачатку чэрвеня стварылі бачнасьць рамонту і на гэтым усё скончылася. Гэта зроблена для таго, каб мець падставу для забароны акцый».
ГЛЯДЗІЦЕ ТАКСАМА: У Берасьці супрацоўнік акумулятарнага заводу прынёс «пахавальныя кветкі» пікетоўцам. Што гэта было?16 жніўня група праціўнікаў будаўніцтва акумулятарнага заводу накіравала ў Генэральную пракуратуру скаргу на забарону мітынгаў. Падпісанты просяць прыняць меры пракурорскага рэагаваньня да службовых асоб Берасьцейскага райвыканкаму, якія ініцыявалі фіктыўны, на іх думку, рамонт на стадыёне, а таксама да кіраўнікоў арганізацыі, якая ажыцьцяўляе гэтыя «работы».
Грамадская кампанія супраць акумулятарнага заводу пачалася ў студзені 2018 году. За гэты час актывісты падалі заяўкі на правядзеньне ў Берасьці і раёне 197 мітынгаў, 12 пікетаў і 16 дэманстрацый. Улады санкцыянавалі толькі адну: леташні мітынг «Берасьцейкі супраць сьвінцу», на які прыйшлі каля 2 тысяч чалавек.
Пратэсты супраць акумулятарнага заводу ў Берасьці. Што важна ведаць
Месцазнаходжаньне новага акумулятарнага заводу пад Берасьцем
- Завод пабудавалі каля вёсак Хабы, Шчэбрын і Тэльмы-2, што пад Берасьцем. За два кілямэтры — рака Мухавец. Афіцыйная экалягічная экспэртыза прагназавала, што ўзьдзеяньне заводу на асяродзьдзе і чалавека будзе нязначнае. Аднак людзі ўсё роўна баяцца, што выкіды з заводу падарвуць ім здароўе.
- Пратэсты супраць акумулятарнага заводу ў Берасьці трывалі ад пачатку 2018 году, калі людзі даведаліся пра будоўлю. Праціўнікі заводу лічаць вытворчасьць «бруднай» і небясьпечнай, заяўляюць пра парушэньні працэдураў будаўніцтва.
- Штонядзелі пратэстоўцы выходзілі на цэнтральную плошчу ў Берасьці. Блогераў і актывістаў затрымлівалі, выносілі ім папярэджаньні, штрафавалі і абавязвалі выбачыцца за відэа пра акумулятарны завод.
- Актывісты сабралі больш за 37 тысяч подпісаў супраць заводу ды накіравалі іх у адміністрацыю Лукашэнкі ў лютым 2018 году. Аднак урадавая камісія ня выявіла парушэньняў у рэалізацыі праекту па будаўніцтве заводу.
- У траўні 2018 году актывісты накіравалі ў адміністрацыю прэзыдэнта больш за 2,5 тысячы подпісаў за адстаўку чыноўнікаў Берасьця, бо тыя «ігнаруюць інтарэсы жыхароў Берасьцейскага рэгіёну і сьвядома заплюшчваюць вочы на шкоду ад заводу».
- У верасьні 2018 году на будоўлі заводу выявілі парушэньні пажарнай бясьпекі.
- У чэрвені 2019 году падчас пусканаладачных работ на заводзе зафіксавалі перавышэньне забруджвальных выкідаў у атмасфэрнае паветра.
- 14 чэрвеня старшыня Берасьцейскага аблвыканкаму Анатоль Ліс прыпыніў будаўніцтва заводу да ліквідацыі выяўленых парушэньняў.
- У ліпені 2019 праект акумулятарнага завода атрымаў адмоўнае заключэньне дзяржаўнай экалягічнай экспэртызы, У Мінпрыроды паведамілі, што прычынай стала прадстаўленьне недакладных дадзеных. У жніўні праектную дакумэнтацыю паўторна падалі на экспэртызу, але пазьней кампанія адклікала дакумэнты «па прычыне неабходнасьці ўсебаковага і больш поўнага адлюстраваньня інфармацыі аб унесеных зьменах».
- 24 лютага 2020 году праектную дакумэнтацыю акумулятарнага завода пасьля карэкціроўкі зноў падалі на дзяржаўную экалягічную экспэртызу. Грамадзкая экспэртыза, якую даручаў правесьці Лукашэнка, правалілася.
- 22 чэрвеня 2020 году Лукашэнка пааабяцаў правесьці рэфэрэндум наконт лёсу заводу пасьля прэзыдэнцкіх выбараў.
- 15 сакавіка 2021 году завод увялі ў эксплюатацыю. У правядзеньні рэфэрэндуму актывістам адмовілі.