У некаторых рэгіёнах Беларусі бракуе вакцыны «Эўпэнта» і бацькам прапануюць выкарыстоўваць іншыя вакцыны платна.
Міністар аховы здароўя Ўладзімер Каранік у інтэрвію Свабодзе паведаміў, што «Эўпэнта» зьявіцца ў жніўні-верасьні, а цяпер праводзіцца пераразьмеркаваньне, дзетак будуць бясплатна прышчапляць іншымі вакцынамі, якіх у Беларусі назапашана дастаткова.
«Праводзіцца пасутачны аналіз, як праходзіла закупка, калі былі заяўкі. Але зрыву календару вакцынацыі ня будзе», — сказаў Свабодзе міністар Каранік.
Уладзімер Каранік
«Пастаўкі чакаюцца ў жніўні-верасьні. На гэты момант у Беларусі ёсьць дастатковая колькасьць вакцыны „Эўпэнта“ вытворчасьці карэйскай кампаніі LG, а таксама іншых вытворцаў (Sanofi Pasteur, Францыя, і GlaxoSmithKline, Вялікая Брытанія).
Цяпер Мінздароўя інфармуе пярвічнае зьвяно, што неабходна зрабіць пераразьмеркаваньне вакцыны, і каляндарны плян прышчэпак будзе выконвацца ў поўным аб’ёме. Ніякага зрыву ня будзе. Імуналягічных прэпаратаў на сёньняшні дзень у краіне дастаткова. Адбылася нейкае непаразуменьне: народ на месцах ня быў інфармаваны, што, калі няма „Эўпэнты“, маем чым яе замяніць», — расказаў міністар.
ГЛЯДЗІЦЕ ТАКСАМА: Мінздароўя адказала на просьбу адкрытага расьсьледаваньня па прышчэпцы «Эўпэнта»Уладзімер Каранік абяцаў ужо на наступным тыдні ўвайсьці ў нармальны графік імунізацыі, дзетак пачнуць запрашаць на прышчэпкі:
«Іншыя вакцыны таксама бясплатныя. Мы разумеем, што ёсьць кампанэнты ў вакцынах, на якія ў дзетак можа быць індывідуальная непераноснасьць, таму заўсёды закупляюцца альтэрнатыўныя прэпараты для такіх людзей».
ГЛЯДЗІЦЕ ТАКСАМА: Вакцыны «Эўпэнта» не хапае ў Берасьцейскай і Горадзенскай абласьцяхСкандал з карэйскай вакцынай у Беларусі. Што важна ведаць
- 13 жніўня ў Ганцавіцкім раёне двухмесячны хлопчык памёр пасьля прышчэпкі. 14 жніўня дзяўчынка такога ж узросту трапіла ў рэанімацыю пасьля плянавай прышчэпкі. Пазьней стала вядома, што ў траўні пасьля прышчэпкі «Эўпэнты» памерла чатырохмесячная дзяўчынка.
- Вакцыны бароняць ад шматлікіх вірусаў. Пра некаторыя інфэкцыйныя хваробы забыліся толькі таму, што ёсьць прышчэпкі. Калі перастаць прышчапляцца, інфэкцыі досыць хутка вяртаюцца.
- Аднак у мэдыцыне зрэдку, кажуць спэцыялісты, здараюцца такія трагедыі, як у Ганцавічах, калі мае месца індывідуальная рэакцыя, не зьвязаная зь якасьцю прэпарату.
- На пэрыяд расьсьледаваньня выкарыстаньне ў Беларусі імунабіялягічных сродкаў «Эўпэнта» той сэрыі, прышчэпкі зь якой былі ўведзеныя пацярпелым дзецям, прыпынілі. Карэйскую вакцыну «Эўпэнта» Мінздароўя закупіла замест расейскай АКДС у 2017 годзе.
- Часопіс «Ежедневник» апублікаваў расьсьледаваньне ў дзьвюх частках, у якім сьцьвярджае, што вакцына незарэгістраваная ў Беларусі і не праходзіла праверак у краіне. Цэнтар экспэртызаў і выпрабаваньняў у ахове здароўя пацьвердзіў гэта Свабодзе.
- З нагоды публікацыяў «Ежедневника» Мінздароўя зьвярнулася ў пракуратуру. Сьледчы камітэт тым часам правярае парадак закупкі, якасьць і сэртыфікацыю вакцыны, як таго ў пэтыцыі патрабавалі дзьве тысячы беларусаў.
- 10% лекавых сродкаў трапляюць у Беларусь без рэгістрацыі.
- Мінздароўя палічыла дастатковым тое, што вакцына прайшла праверку якасьці Ўсясьветнай арганізацыяй здароўя. Аднак, згодна зь беларускім заканадаўствам, гэтага не дастаткова для выкарыстаньня яе ў краіне ў штатаных сытуацыях. 29 жніўня Мінздароўя патлумачыла выкарыстаньне вакцыны «надзвычайнай сытуацыяй».
- Пасьля трагедыі ў Ганцавіцкім раёне і скандал з вакцынай сям’я зь Менску расказала пра сьмерць дачкі, якой таксама ўвялі карэйскую вакцыну «Эўпэнта».
- Усё гэта адбываецца на тле карупцыйнай «справы лекараў», у якой падазраванымі ў хабарах на сотні тысячаў даляраў праходзяць кіраўнікі шматлікіх мэдычных установаў Беларусі і чыноўнікі Міндзароўя.