У Літве неўзабаве адбудзецца зьмена ўлады — зьявяцца новы прэзыдэнт і новы ўрад, таму чакаецца пэўная перазагрузка ў дачыненьнях зь Беларусьсю.
У Сэйме Літвы 15 траўня на слуханьні па Беларусі запрасілі чатырох прадстаўнікоў беларускай апазыцыі: Уладзімера Някляева, Алеся Бяляцкага, Міколу Статкевіча і Паўла Севярынца. Някляеў і Бяляцкі не змаглі прыехаць.
Зь літоўскага боку на слуханьнях прысутнічалі былы прэм’ер-міністар Андрус Кубілюс, дэпутаты ад розных партыяў, прадстаўнікі міністэрстваў замежных спраў, унутраных спраў, няўрадавых арганізацыяў, якія працуюць зь Беларусьсю, прэса.
Севярынец: «БелАЭС — расейская ядзерная бомба, падкінутая пад плот суседзям»
Паводле аднаго з удзельнікаў слуханьняў Паўла Севярынца, літоўскіх палітыкаў, парлямэнтароў найперш непакоіць будаўніцтва АЭС у Астраўцы, што літаральна за 20 кілямэтраў ад мяжы.
«Цікавілі ўсіх два асноўныя пытаньні: Аляксандар Лукашэнка і АЭС. Мы дадалі яшчэ некалькі. Мая пазыцыя па Лукашэнку — ён не зьяўляецца гарантам незалежнасьці. Мы дзякавалі літоўцам за іх прынцыповую пазыцыю ў гэтым пытаньні. Арыентавацца тут трэба на беларускі народ, менавіта ён — гарант незалежнасьці, а зусім не рэжым. Таксама для нас відавочна, што Лукашэнка выкарыстоўвае стасункі з Эўропай толькі для шантажу Масквы альбо для продажу гэтых стасункаў за чарговы крэдыт», — пераказаў сваю пазыцыю сустаршыня БХД Павал Севярынец.
ГЛЯДЗІЦЕ ТАКСАМА: «Грыбаўскайце зразумела, што з Пуціным і Лукашэнкам наўрад ці магчыма ісьці на дыялёг», — літоўскі палітолягПаводле ягоных словаў, для літоўцаў АЭС у Астраўцы — праблема № 1 у дачыненьнях зь Беларусьсю.
«Мая пазыцыя: БелАЭС — расейская ядзерная бомба, падкінутая пад плот суседзям, літаральна за 50 км ад літоўскай сталіцы. Гэта недапушчальна. Усе дэмакратычныя партыі Беларусі сфармулявалі сваю пазыцыю — закрыцьцё станцыі. То бок бясьпека, тэсты — гэта ўсё размовы. Толькі закрыцьцё. І мы лічылі б патрэбным стварэньне моцнай заходняй кааліцыі, якая дамагалася б і ад Расеі, і ад Беларусі закрыцьця гэтага праекту ў краіне, што пацярпела ад Чарнобылю», — заявіў Севярынец.
Таксама ішла гаворка пра перапахаваньне парэшткаў Кастуся Каліноўскага, пра палітычных вязьняў, пра Курапаты. У прыватнасьці, пра той факт, што ў Курапатах зьнесьлі і літоўскі крыж, які быў там усталяваны.
Паводле Севярынца, была дасягнутая дамоўленасьць, што такія слуханьні «павінны стаць рэгулярнымі для таго, каб палітыка на крытычна важным для літоўцаў беларускім кірунку была ўстойлівай».
ГЛЯДЗІЦЕ ТАКСАМА: Беларусь і Літва ўступілі ў дыпляматычную спрэчку вакол БелАЭС