Старшыня камісіі Палаты прадстаўнікоў па правах чалавека, нацыянальных дачыненьнях і сродках масавай інфармацыі Андрэй Навумовіч папрасіў вызваліць яго ад абавязкаў старшыні камісіі. Гэта адбылося на яе пасяджэньні 13 траўня.
Як дазналася Свабода, матыў ягонага ўчынку — пераход на іншую працу. 55-гадовы дэпутат, які ўжо другую кадэнцыю запар ачольвае камісію, цяпер будзе кіраваць сакратарыятам Палаты прадстаўнікоў. Гэтае месца стала вакантным пасьля таго, як выйшла на пэнсію Галіна Юрэвіч.
19 красавіка ў штогадовым пасланьні да беларускага народу і парлямэнту Аляксандар Лукашэнка прапанаваў правесьці парлямэнцкія выбары 7 лістапада 2019 году. Прэзыдэнцкія выбары ён прапанаваў правесьці ў 2020 годзе. Гэта азначае скарачэньне тэрміну паўнамоцтваў дзейнай Палаты прадстаўнікоў прыкладна на 10 месяцаў. Цяперашнія дэпутаты пачынаюць шукаць сабе новыя месцы працы.
ГЛЯДЗІЦЕ ТАКСАМА: Тры дэпутаты пакінулі Палату прадстаўнікоў. Але давыбараў ня будзеУ размове са Свабодай Андрэй Навумовіч пацьвердзіў, што ён зьмяняе пасаду.
«Але дэпутатам я застануся. Буду працаваць, як і раней, па поўнай праграме, рэгулярна наведваць сваю Лідзкую акругу № 55. А на пасадзе старшыні камісіі мяне заменіць хтосьці з маіх калегаў-дэпутатаў, бо кіраваць сакратарыятам і камісіяй адначасова ня хопіць часу».
Спадар Навумовіч паведаміў, што ён па-ранейшаму застаецца кіраўніком працоўнай групы дзеля вывучэньня праблематыкі сьмяротнага пакараньня, якая створаная ў Нацыянальным сходзе. Дэпутат дадаў, што на 30 траўня ў Менску заплянаваная вялікая канфэрэнцыя па гэтым пытаньні пад эгідай Рады Эўропы.
ГЛЯДЗІЦЕ ТАКСАМА: У Брусэлі дыскутавалі, чаму ў Беларусі працягваюць ужываць сьмяротнае пакараньне