Сваякі затрыманых і прадстаўнікі грамадзкасьці не змаглі трапіць на канвэер судоў над актывістамі, якія пратэставалі супраць будаўніцтва ля Берасьця акумулятарнага заводу.
Працэсы праходзяць проста ў Ленінскім РАУС. Не пусьцілі нават сваякоў затрыманых.
Двух затрыманых актывістаў за ўдзел у розныя дні ў акцыях пратэсту супраць акумулятарнага заводу пакаралі штрафамі. Мікалай Трацюк атрымаў 10 базавых велічыняў штрафу (255 рублёў) за акцыю 14 красавіка, а Алег Ярмоленка — 30 базавых (765 рублёў) за акцыю 7 красавіка.
За няяўку ў міліцыю па позьве (позва была выпісана якраз на час, калі праходзіла акцыя пратэсту) аштрафаваны на 1 базавую велічыню (25,5 рубля) актывіст Дзьмітрый Бекалюк.
Усе справы пратэстоўцаў разглядае судзьдзя Ленінскага суду Берасьця Аляксандар Семянчук.
ГЛЯДЗІЦЕ ТАКСАМА: Лічба дня: 14 чалавек будуць судзіць у Берасьці за пратэсты супраць акумулятарнага заводуАгулам разглядаліся справы ад 14 да 16 чалавек, праваабаронцы яшчэ ўдакладняюць зьвесткі. Некаторыя працэсы перанесьлі, бо пратэстоўцы хадайнічалі, каб ім далі магчымасьць заключыць дамовы з адвакатамі і час на азнаямленьне са справамі.
18 красавіка працягнецца разгляд спраў актывістаў Дзям’яна Лепясевіча, Алега Вялава, Дзяніса Малашанкі, Дзьмітрыя Андрасюка, Сяргея Сьвірскага, Уладзіслава Абрамовіча, Уладзімера Казлоўскага і праваабаронцы Ўладзімера Вялічкіна.
На 24 красавіка перанесьлі суд над Віталём Казаком, на 25 красавіка — суды Ягора Кандрацюка, Віктара Сендэра.
Алесь Абляк, які 14 красавіка выступаў на плошчы з мэгафонам, сказаў, што ягоны працэс працягнецца таксама 25 красавіка.
«Я заявіў хадайніцтва, каб працэс быў па-беларуску, а калі яны такога ня могуць зрабіць, каб далі перакладчыка. Апроч таго, заявіў хадайніцтва, каб азнаёміцца са справай. Судзьдзя абвясьціў перапынак да 25 красавіка. Чаму так адбылося, што судзілі ў РАУС? Я думаю, што гэта зроблена для таго, каб менш людзей было на працэсе. Мяне вінавацяць за ўдзел у акцыі 14 красавіка, некаторых людзей — за іншыя акцыі», — сказаў Алесь Абляк.
Трапіць на суды немагчыма
Праваабаронца Раман Кісьляк сказаў у інтэрвію Свабодзе, што ў такім правядзеньні паседжаньняў судоў у РАУС ён бачыць парушэньне.
ГЛЯДЗІЦЕ ТАКСАМА: Зь міліцэйскім аншлягам. У Берасьці за абразу чатырох міліцыянтаў судзяць блогера Пятрухіна«Я спрабаваў трапіць, іншыя грамадзяне, сваякі. Мне сказалі, што мяне ня пусьцяць, што судзьдзя ня хоча мяне бачыць на працэсе. Фактычна судовыя паседжаньні былі закрытыя, што парушае Працэсуальна-выканаўчы кодэкс аб адміністрацыйных правапарушэньнях. Я ня бачу ніякіх падставаў, каб гэтыя працэсы былі закрытыя», — заявіў Раман Кісьляк.
Праваабаронцы будуць абскарджваць нядопуск грамадзян на адкрытыя судовыя паседжаньні.
У пятніцу міліцыя затрымала 9 чалавек, калі тыя прыйшлі ў Ленінскі РАУС з позвамі.
ГЛЯДЗІЦЕ ТАКСАМА: «Мне стала страшна як лекару і маці». Чаму берасьцейская доктарка змагаецца супраць акумулятарнага заводу14 красавіка ў Берасьці адбыўся чарговы пратэст супраць пабудовы акумулятарнага заводу. Ня менш за 200 чалавек сабраліся на плошчы Леніна і прайшлі цэнтральнымі вуліцамі гораду, скандуючы лёзунгі «Не — заводу!», «Свабоду!»
Падчас акцыі міліцыянты, супрацоўнікі АМАП выхоплівалі з калёны найбольш актыўных дэманстрантаў. Некаторых людзям удавалася адбіць, аднак потым іх затрымлівалі.
Пратэсты супраць акумулятарнага заводу ў Берасьці. Што важна ведаць
Месцазнаходжаньне новага акумулятарнага заводу пад Берасьцем
- Завод пабудавалі каля вёсак Хабы, Шчэбрын і Тэльмы-2, што пад Берасьцем. За два кілямэтры — рака Мухавец. Афіцыйная экалягічная экспэртыза прагназавала, што ўзьдзеяньне заводу на асяродзьдзе і чалавека будзе нязначнае. Аднак людзі ўсё роўна баяцца, што выкіды з заводу падарвуць ім здароўе.
- Пратэсты супраць акумулятарнага заводу ў Берасьці трывалі ад пачатку 2018 году, калі людзі даведаліся пра будоўлю. Праціўнікі заводу лічаць вытворчасьць «бруднай» і небясьпечнай, заяўляюць пра парушэньні працэдураў будаўніцтва.
- Штонядзелі пратэстоўцы выходзілі на цэнтральную плошчу ў Берасьці. Блогераў і актывістаў затрымлівалі, выносілі ім папярэджаньні, штрафавалі і абавязвалі выбачыцца за відэа пра акумулятарны завод.
- Актывісты сабралі больш за 37 тысяч подпісаў супраць заводу ды накіравалі іх у адміністрацыю Лукашэнкі ў лютым 2018 году. Аднак урадавая камісія ня выявіла парушэньняў у рэалізацыі праекту па будаўніцтве заводу.
- У траўні 2018 году актывісты накіравалі ў адміністрацыю прэзыдэнта больш за 2,5 тысячы подпісаў за адстаўку чыноўнікаў Берасьця, бо тыя «ігнаруюць інтарэсы жыхароў Берасьцейскага рэгіёну і сьвядома заплюшчваюць вочы на шкоду ад заводу».
- У верасьні 2018 году на будоўлі заводу выявілі парушэньні пажарнай бясьпекі.
- У чэрвені 2019 году падчас пусканаладачных работ на заводзе зафіксавалі перавышэньне забруджвальных выкідаў у атмасфэрнае паветра.
- 14 чэрвеня старшыня Берасьцейскага аблвыканкаму Анатоль Ліс прыпыніў будаўніцтва заводу да ліквідацыі выяўленых парушэньняў.
- У ліпені 2019 праект акумулятарнага завода атрымаў адмоўнае заключэньне дзяржаўнай экалягічнай экспэртызы, У Мінпрыроды паведамілі, што прычынай стала прадстаўленьне недакладных дадзеных. У жніўні праектную дакумэнтацыю паўторна падалі на экспэртызу, але пазьней кампанія адклікала дакумэнты «па прычыне неабходнасьці ўсебаковага і больш поўнага адлюстраваньня інфармацыі аб унесеных зьменах».
- 24 лютага 2020 году праектную дакумэнтацыю акумулятарнага завода пасьля карэкціроўкі зноў падалі на дзяржаўную экалягічную экспэртызу. Грамадзкая экспэртыза, якую даручаў правесьці Лукашэнка, правалілася.
- 22 чэрвеня 2020 году Лукашэнка пааабяцаў правесьці рэфэрэндум наконт лёсу заводу пасьля прэзыдэнцкіх выбараў.
- 15 сакавіка 2021 году завод увялі ў эксплюатацыю. У правядзеньні рэфэрэндуму актывістам адмовілі.