У Навабускім раёне Мікалаеўскай вобласьці, дзе супольнае беларуска-ўкраінскае прадпрыемства «Белаўтадар-Украіна» рамантуе дарогу, мясцовыя жыхары спрабавалі перакрыць трасу. Яны незадаволеныя якасьцю працы беларускіх аўтадарожнікаў.
В Миколаївській обл. місцеві жителі заблокували неякісний ремонт дороги... Отак в Україні ремонтує дороги білоруська контора🙄 pic.twitter.com/f6VDMDB9yd
— Kott (@prosto_kot) April 13, 2019
«Сапраўды, такая спроба заблякаваць дарогу мела месца ў мінулую пятніцу, 13 красавіка. Але пытаньне ўжо ўрэгуляванае і работы працягваюцца», — паведамілі Свабодзе ў «Белаўтадар-Украіна».
У той жа час у Навабускай раённай дзяржаўнай адміністрацыі паведамілі, што інфармацыі аб канфлікце зь беларускімі аўтадарожнікамі ня маюць. Паліцыя Мікалаеўскай вобласьці таксама сьцьвярджае, што на сёньняшні дзень ні ў адным з раёнаў рэгіёну няма блякаваньня дарог мясцовымі жыхарамі. На гарачай лініі «Укравтодору» таксама паведамілі, што не атрымлівалі ніякіх скаргаў і інфармацыі аб праблемах рамонту дарог у Мікалаеўскай вобласьці.
Частина друга... pic.twitter.com/y78C7PhJzt
— Kott (@prosto_kot) April 13, 2019
Кампанія «Будаўніча-мантажны трэст №8», якая ўваходзіць у структуру «Белаўтадар», летась у траўні выйграла тэндэр на рамонт дарогі Н-11 Дняпро — Мікалаеў (праз Крывы Рог) вартасьцю 92,103 мільёна грыўняў (амаль 3,5 мільёна даляраў у эквіваленце). Сёлета беларускія аўтадарожнікі плянавалі асвоіць 90 % сродкаў гэтага кантракту.
Летась у верасьні для забесьпячэньня работ у Новым Бугу Мікалаеўскай вобласьці змантавалі асфальтабэтонны завод, але сёлета ў лютым яго падпалілі невядомыя.
Белавтодор... ага pic.twitter.com/erpVkAZJN6
— Kott (@prosto_kot) April 13, 2019
Паводле папярэдніх высноў Мікалаеўскай абласной дзяржаўнай адміністрацыі, сёлета гэты завод ня зможа аднавіць выраб асфальтабэтонных сумесяў і будзе вымушаны набываць іх ва ўкраінскіх кампаній.
Кіраўнік Мікалаеўскай абласной дзяржаўнай адміністрацыі Аляксей Саўчанка ня выключыў, што падпал зьвязаны з канкурэнтнай барацьбой у гэтай сфэры. Ён падазраваў магчымае дачыненьне да падпалу тых падрадных кампаній, якія раней рамантавалі дарогі ў гэтым рэгіёне. У кампаніі «Белаўтадар-Украіна» паведамілі, што расьсьледаваньне гэтай справы яшчэ не завершанае.