Прэзыдэнт Злучаных Штатаў Дональд Трамп заявіў у чацьвер, што ЗША прызна́юць сувэрэнітэт Ізраілю над Галянскімі вышынямі – сырыйскай тэрыторыяй, захопленай падчас Шасьцідзённай вайны 1967 году і з таго часу кантраляванай Ізраілем, расказвае «Голас Амэрыкі».
Фармальная анэксія Ізраілем Галянскіх вышыняў адбылася ў 1981 годзе, але міжнародная супольнасьць не прызнала яе законнай і лічыць землі акупаванымі.
After 52 years it is time for the United States to fully recognize Israel’s Sovereignty over the Golan Heights, which is of critical strategic and security importance to the State of Israel and Regional Stability!
— Donald J. Trump (@realDonaldTrump) March 21, 2019
У Twitter Дональд Трамп напісаў, што Галянскія вышыні «маюць вырашальнае стратэгічнае значэньне і важныя для бясьпекі дзяржавы Ізраіль і рэгіянальнай стабільнасьці».
Гэтая заява была апублікаваная падчас таго, як Дзяржаўны сакратар ЗША Майк Пампэа знаходзіўся ў Ерусаліме, наведаў спрэчную тэрыторыю Ерусаліму, Заходнюю сьцяну, або Сьцяну плачу. Візыт стаў нефармальным прызнаньнем кантролю Ізраілю над юдэйскай сьвятыняй — Пампэа пабываў там ня як прыватная асоба, а з ізраільскім прэм’ер-міністрам Біньямінам Нэтаньягу.
«Прэзыдэнт Трамп толькі што ўвайшоў у гісторыю, — сказаў Нэтаньягу пасьля заявы Трампа аб Галянскіх вышынях. — Пасланьне, якое прэзыдэнт Трамп перадаў сьвету, гаворыць, што Злучаныя Штаты падтрымліваюць Ізраіль. Мы глыбока ўдзячныя ЗША за падтрымку».
Дзяржаўны дэпартамэнт ЗША яшчэ на мінулым тыдні ў справаздачы аб правах чалавека назваў Галянскія вышыні «тэрыторыямі, кантраляванымі Ізраілем» замест ранейшай фармулёўкі «акупаваныя тэрыторыі».