Авіяцыйныя ўлады Этыёпіі і Кітаю абвясьцілі аб рашэньні прыпыніць палёты самалётаў Boeing 737 MAX 8, адзін зь якіх разьбіўся напярэдадні, забраўшы жыцьці 157 чалавек.
Вытворца самалётаў у ЗША заявіў, што адпраўляе ў Этыёпію каманду для аказаньня тэхнічнай дапамогі. 11 сакавіка абвешчана нацыянальным днём жалобы ў Этыёпіі.
Пасажырскі самалёт авіякампаніі Ethiopian Airlines 10 сакавіка пацярпеў крушэньне падчас рэйсу з Адыс-Абэбы ў Найробі. На борце самалёта Boeing 737 MAX 8 знаходзіліся 149 пасажыраў і 8 чалавек экіпажу, ня выжыў ніхто.
ГЛЯДЗІЦЕ ТАКСАМА: У крушэньні «Боінга» ў Этыёпіі загінулі 157 чалавекПрадстаўнік авіякампаніі заявіў, што аварыя адбылася каля этыёпскага гораду Бішофту, неўзабаве пасьля вылету са сталіцы. Паводле паведамленьняў, пілёт паведаміў пра праблемы з бортам і папрасіў вярнуцца ў сталіцу Этыёпіі.
На борце самалёта знаходзіліся пасажыры з больш чым 30 краінаў, у тым ліку 32 кенійцы, 18 канадцаў, 7 брытанцаў, 5 немцаў, 3 расіянай і адзін сэрб. У ААН паведамілі, што 19 яе супрацоўнікаў былі сярод ахвяраў.
Самалёт 737 MAX 8 быў у камэрцыйным выкарыстаньні з 2017 году.
Гэта ўжо другая авіякатастрофа гэтай мадэлі самалёта за менш чым шэсьць месяцаў. У кастрычніку ў акіян каля ўзьбярэжжа Інданэзіі зваліўся самалёт інданэзійскай авіякампаніі Lion Air, у выніку чаго загінулі 189 чалавек.