Менскі раённы суд аштрафаваў на 1020 рублёў (40 базавых велічыняў) абаронцу Курапат, старшыню «Маладога фронту» Дзяніса Ўрбановіча. Яго прызналі вінаватым у непадпарадкаваньні міліцыі падчас пікетаваньня рэстарацыі «Поедем поедим» каля Курапат.
Эпізод, які разглядаў суд, адбыўся ўвечары 23 лютага. Дзяніс Урбановіч стаяў разам зь іншымі пікетоўцамі каля брамы рэстарацыі. Яны спынялі аўтамабілі і тлумачылі кіроўцам, чаму трэба байкатаваць забаўляльную ўстанову, разьмешчаную каля месца масавых расстрэлаў. Адзін з кіроўцаў выклікаў супрацоўнікаў ДАІ.
Вось што адбывалася пазьней, па словах сьведкі — супрацоўніка ДАІ Віталя Ваўчаніна:
«Мы склалі пратакол на Ўрбановіча. Чаму на яго? Бо ён пэўна там знаходзіўся, а мы папярэдзілі ўсіх, што яны парушаюць закон, адмаўляючыся сысьці з дарогі, але на заўвагу ніхто не адрэагаваў».
Ці зрабіў хто з супрацоўнікаў заўвагу непасрэдна Ўрбановічу? Адказаць на гэтае пытаньне судзьдзі Віктара Шаўцова сьведка ня змог: «Ня памятаю».
Іншы сьведка, міліцыянт Віктар Кунтыш таксама ня змог пэўна акрэсьліць віну Дзяніса Ўрбановіча, акрамя таго, што той «быў сярод пікетоўцаў і адмовіўся падпісваць пратакол аб правапарушэньні».
Яшчэ адзін сьведка, міліцыянт Сяргей Лукашанец сказаў, што на Дзяніса Ўрбановіча яму паказаў кіроўца, які патэлефанаваў у ДАІ.
«Што менавіта ён перашкаджаў праезду. Урбановіча папярэдзілі, што ён парушае, але ён застаўся на дарозе», — сказаў сьведка.
Між тым, паводле сьведкі — супрацоўніка ДАІ Віталя Сушчэні, Дзяніс Урбановіч пасьля складаньня пратаколу патрабаваньне міліцыянтаў выканаў: «Так, потым ён сышоў з дарогі на тратуар».
Што да Дзяніса Ўрбановіча, ён настойвае на тым, што да складаньня на яго пратаколу ад яго ніхто не патрабаваў сысьці з дарогі і не папярэджваў яго аб адказнасьці за непадпарадкаваньне. У судзе актывіст адмовіўся даваць паказаньні. Раней, у перапынку, ён гэтак распавёў журналістам пра тыя падзеі.
«Гэта няпраўда, што мяне папярэджвалі аб адказнасьці за непадпарадкаваньне. Было ўжо цёмна. Я бачыў, што да рэстарацыі прыехаў аўтамабіль ДАІ, але мне ніякіх прэтэнзій ніхто не выказваў, тым больш я нічога не парушаў».
Ноч з 25 на 26 лютага Дзяніс Урбановіч адбыў у ізалятары часовага ўтрыманьня на вуліцы Скарыны. На руку і тулава актывіста надзета гіпсавая павязка. Гэта наступства наезду на яго аўтамабіля каля рэстарацыі, інцыдэнт здарыўся 16 лютага. У актывіста падазраюць траўмы сярэдняй цяжкасьці. Ці дазволена міліцыянтам зьмяшчаць чалавека ў ізалятар у такім стане?
Гэтага Дзянісу Ўрбановічу ў міліцыі ніхто не патлумачыў. Па ягоных словах, у Менскім райаддзеле міліцыі ён прасіў выклікаць да яго лекара ці хуткую дапамогу, каб лекары яго агледзелі і далі дазвол на зьмяшчэньне ў ізалятар.
«У мяне ж з сабой не было абязбольвальных сродкаў, а рука і хрыбетнік баляць, раптам стане горш. Вось я і прасіў з гэтым разабрацца, але лекара да мяне так і ня выклікалі. Маю скаргу, відаць, проста выкінулі ў сьметніцу. Блізка да вечара запхнулі ў міліцэйскі аўтамабіль і павезьлі ў ізалятар. Ноч я фактычна ня спаў, бо ў камэры душна і ляжаць з гіпсам нязручна. Хрыбетнік яшчэ баліць», — сказаў Дзяніс Урбановіч.
25 лютага, Дзяніса Ўрбановіча выклікалі ў Менскае абласное ДАІ па накіраваньне на экспэртызу, якую меліся прызначыць на сёньня, 26 лютага.
«Але толькі выйшаў з дому, як аднаго ў гіпсе 5 амапаўцаў затрымалі і павезьлі ў Бараўлянскае аддзяленьне. Вось і ўся экспэртыза», — сказаў пра ўчорашняе затрыманьне абаронца Курапат Дзяніс Урбановіч.
За час пікетаваньня рэстарацыі «Поедем поедим», з чэрвеня 2018 году, Дзянісу Ўрбановічу чатыры разы прысуджалі адміністрацыйны арышт. Агулам ён адбыў за кратамі ў менскім раённым ізалятары на вуліцы Скарыны 39 дзён.
Пратэсты супраць рэстарацыі ля Курапатаў. Што важна ведаць
Што адбываецца. Грамадзкія і палітычныя актывісты з чэрвеня 2018 году пікетуюць рэстаран «Поедем поедим», што месьціцца ля Курапатаў. За 50 мэтраў ад гэтага месца ў 1930-я адбываліся масавыя расстрэлы. Карнікі НКВД расстралялі тут, па розных ацэнках, ад 30 тысяч да 250 тысяч чалавек.
З чаго ўсё пачалося. Будоўля забаўляльнага комплексу пад назвай «Бульбаш-хол» пачалася ў 2012 годзе ў ахоўнай зоне Курапатаў. У 2014-м ахоўную зону зьменшылі. Гісторыя будаўніцтва і змаганьня тут.
Рэстаран каля Курапат не парушаў зоны аховы? МАПЫ
1 чэрвеня 2018 рэстаран «Поедем поедим» пачаў рэклямавацца ў інтэрнэце я, а ўвечары 5 чэрвеня меркавана пачаў працаваць.
З таго часу грамадзкія актывісты штодня пікетуюць рэстаран, патрабуючы яго закрыцьця і сьцьвярджаючы, што ён парушае ахоўную зону вакол народнага мэмарыялу і не адпавядае нормам грамадзкай маралі.
Як праходзяць пратэсты. Са сьцягамі і плакатамі абаронцы Курапатаў блякавалі транспарт, які накіроўваўся на тэрыторыю рэстарана. За гэта рэгулярна атрымліваюць штрафы ад ДАІ за парушэньне ПДД, а таксама іх штрафуюць і садзяць на суткі за несанкцыянаванае пікетаваньне. Некаторыя актывісты маюць ужо па некалькі дзясяткаў штрафаў.
За час пікетаваньня «Поедем поедим» неаднаразова адбываліся сутычкі паміж актывістамі і наведнікамі ды ахоўнікамі рэстарана, заблякаваныя аўтамабілі, наяжджалі на пікетоўцаў, актывісту нават зламалі руку.
Рэакцыя ўласьнікаў. Не дачакаўшыся рэакцыі ўладальнікаў рэстарана на патрабаваньне закрыць або перанесьці ўстанову, 18 ліпеня абаронцы Курапатаў заклікалі да байкоту ўсіх рэстаранаў аднаго з сузаснавальнікаў рэстарацыі бізнэсоўца Леаніда Зайдэса.
20 ліпеня на сустрэчы з журналістамі Зайдэс адмовіўся закрываць «Поедем поедим», але прапанаваў даць грошы на мэмарыялізацыю Курапатаў. Гэта не задаволіла пікетоўцаў, і яны працягнулі пікетаваньне.
Хто адказны за рэстаран у Курапатах. Сьпіс асобаў
Прадстаўнікі партый і рухаў, якія ўдзельнічаюць у Курапацкай вахце, зацьвердзілі сьпіс чыноўнікаў, уладальнікаў, агрэсіўных наведнікаў рэстарацыі «Поедем поедим», якім яны абвясьцілі пэрсанальны байкот. Усяго ў сьпісе 35 прозьвішчаў.
Бізнэсовец Аркадзь Ізраілевіч падаў у суд на незалежнае выданьне «Новы час» і аўтара расьсьледаваньня пра забудову ў Курапатах Дзяніса Івашына, які дапусьціў юрыдычную сувязь паміж ім і рэстаранам.
7 адказаў на наіўныя пытаньні пра рэстаран ля Курапатаў і пратэсты супраць яго
Ня першы чын у Курапатах. Першая грамадзкая абарона Курапатаў адбывалася ў 2001–2002 гг., калі моладзь пратэставала супраць пашырэньня кальцавой дарогі праз урочышча. На пачатку 2017-га актывісты адстаялі Курапаты ад будоўлі бізнэс-цэнтру.
Сталінскія рэпрэсіі і Курапаты
У Беларусі масавыя рэпрэсіі пачаліся яшчэ з прыходам да ўлады бальшавікоў — у 1917 годзе. А скончыліся, калі памёр Сталін — у 1953-м. Дасьледчыкі мяркуюць, што іх зазналі як мінімум 600 тысяч чалавек. Паводле іншых ацэнак, гэтая лічба дасягае 1,4 мільёна. Але дакладная колькасьць невядомая — КДБ дагэтуль не раскрыў архівы.
Your browser doesn’t support HTML5
Сталінскія рэпрэсіі ў Беларусі — асноўнае, што трэба ведаць
Паводле розных падлікаў, ад 30 да 250 тысяч чалавек карнікі НКВД расстралялі з 1937 па 1941 год у Курапатах — лясным масіве пад Менскам.