Бацькі хворай дзяўчынкі маюць намер дайсьці да Вярхоўнага суду.
Судовая калегія Менскага гарадзкога суду не задаволіла апэляцыйную скаргу Марыі Званько на рашэньне суду Маскоўскага раёну, які прызнаў, што камісія Міністэрства аховы здароўя на законных падставах адмовіла ў лячэньні двухгадовай Веры Званько за мяжой за кошт бюджэтных сродкаў.
У маленькай Веры Званько — рэдкае генэтычнае захворваньне СМА (сьпінальна-мышачная атрафія). У Беларусі няма эфэктыўных лекаў ад гэтай хваробы, аднак за мяжой ёсьць вельмі дарагі прэпарат Spinraza (Нусынэрсэн), адзіны афіцыйна дапушчаны для выкарыстаньня ў сьвеце. Ён спыняе прагрэсаваньне хваробы і страту рухавых функцый.
ГЛЯДЗІЦЕ ТАКСАМА: Разабраліся за 5 гадзін. Суд прыняў рашэньне ў справе бацькоў Веры Званько супраць МінздароўяНягледзячы на адсутнасьць альтэрнатывы, Міністэрства аховы здароўя ў жніўні і лістападзе адмовіла бацькам Веры ў накіраваньні дачкі на лячэньне за мяжу, прызнаўшы, што гэта «немэтазгодна». У сьнежні Маскоўскі раённы суд прызнаў рашэньне Мінздароўя цалкам законным.
11 лютага гэта пацьвердзіў і Менгарсуд.
Прычым у сьнежні Маскоўскі раённы суд адхіліў хадайніцтва аб запрашэньні на судовае паседжаньне старшыні камісіі Мінздароўя, каб той распавёў, якім чынам і на падставе якіх аргумэнтаў калегія прымае рашэньні.
ГЛЯДЗІЦЕ ТАКСАМА: «Бяз гэтых лекаў дзіця памрэ». Чаму менская сям’я падала ў суд на Міністэрства аховы здароўяНа аналягічны пісьмовы зварот Свабоды Міністэрства аховы здароўя таксама не адказала.
Гадавы курс лячэньня амэрыканскім сродкам «Сьпінраза», афіцыйна зарэгістраваным у ЗША, ЭЗ і шэрагу іншых краін, каштуе каля 700 тысяч эўра. Бацькі Веры Званько зьбіраюць грошы на лячэньне дачкі праз краўдфандынг.
У дзяржаўным бюджэце 2016 году на лячэньне цяжка хворых і тых, хто шукае донараў за мяжой, было закладзена 622 233 беларускія рублі (крыху больш за 300 тысяч даляраў). Беларуская дзяржава аплаціла лячэньне за мяжой толькі 13 цяжка хворым.