Людзі

Берасьцейскія ўлады адмовілі ў рэфэрэндуме праціўнікам заводу

Мітынг супраць пабудовы акумулятарнага заводу «АйПаўэр», Берасьце, 14 кастрычніка 2018 году

Калі рэфэрэндум, дык толькі рэспубліканскі, бо рашэньне прымаў Лукашэнка.

Ініцыятыўнай групе рэфэрэндуму аб забароне будаўніцтва акумулятарнага заводу пад Берасьцем адмовілі ў рэгістрацыі ў Берасьцейскім раённым выканкаме, паведаміў БелаПАН праваабаронца Раман Кісьляк.

Адмову матывавалі тым, што такое пытаньне ня можа быць вынесенае на мясцовы рэфэрэндум, бо завод мае значэньне для ўсёй Беларусі, будаўніцтва пачалі адпаведна зацьверджанай Аляксандрам Лукашэнкам Дзяржаўнай праграме інавацыйнага разьвіцьця, а забарона на будаўніцтва заводу не ўваходзіць у кампэтэнцыю мясцовых уладаў.

ГЛЯДЗІЦЕ ТАКСАМА: Больш за два месяцы ў няволі. З РАУС у Берасьці вызвалілі галаву ліса

Будаўніцтва акумулятарнага заводу сапраўды значыцца ў такой праграме (PDF). Выканаўца — ТАА «АйПаўэр», тэрміны — 2015–2021 гады.

Паводле Кісьляка, ініцыятыўная група мае намер зьвярнуцца ў суд, а ўлады «забылі, што людзі маюць права браць удзел у рашэньні важных для іх пытаньняў».

Пратэсты супраць акумулятарнага заводу ў Берасьці. Што важна ведаць

Месцазнаходжаньне новага акумулятарнага заводу пад Берасьцем

  • Завод пабудавалі каля вёсак Хабы, Шчэбрын і Тэльмы-2, што пад Берасьцем. За два кілямэтры — рака Мухавец. Афіцыйная экалягічная экспэртыза прагназавала, што ўзьдзеяньне заводу на асяродзьдзе і чалавека будзе нязначнае. Аднак людзі ўсё роўна баяцца, што выкіды з заводу падарвуць ім здароўе.
  • Пратэсты супраць акумулятарнага заводу ў Берасьці трывалі ад пачатку 2018 году, калі людзі даведаліся пра будоўлю. Праціўнікі заводу лічаць вытворчасьць «бруднай» і небясьпечнай, заяўляюць пра парушэньні працэдураў будаўніцтва.
  • Актывісты сабралі больш за 37 тысяч подпісаў супраць заводу ды накіравалі іх у адміністрацыю Лукашэнкі ў лютым 2018 году. Аднак урадавая камісія ня выявіла парушэньняў у рэалізацыі праекту па будаўніцтве заводу.
  • У траўні 2018 году актывісты накіравалі ў адміністрацыю прэзыдэнта больш за 2,5 тысячы подпісаў за адстаўку чыноўнікаў Берасьця, бо тыя «ігнаруюць інтарэсы жыхароў Берасьцейскага рэгіёну і сьвядома заплюшчваюць вочы на шкоду ад заводу».
  • У верасьні 2018 году на будоўлі заводу выявілі парушэньні пажарнай бясьпекі.
  • У чэрвені 2019 году падчас пусканаладачных работ на заводзе зафіксавалі перавышэньне забруджвальных выкідаў у атмасфэрнае паветра.
  • 14 чэрвеня старшыня Берасьцейскага аблвыканкаму Анатоль Ліс прыпыніў будаўніцтва заводу да ліквідацыі выяўленых парушэньняў.
  • У ліпені 2019 праект акумулятарнага завода атрымаў адмоўнае заключэньне дзяржаўнай экалягічнай экспэртызы, У Мінпрыроды паведамілі, што прычынай стала прадстаўленьне недакладных дадзеных. У жніўні праектную дакумэнтацыю паўторна падалі на экспэртызу, але пазьней кампанія адклікала дакумэнты «па прычыне неабходнасьці ўсебаковага і больш поўнага адлюстраваньня інфармацыі аб унесеных зьменах».
  • 24 лютага 2020 году праектную дакумэнтацыю акумулятарнага завода пасьля карэкціроўкі зноў падалі на дзяржаўную экалягічную экспэртызу. Грамадзкая экспэртыза, якую даручаў правесьці Лукашэнка, правалілася.
  • 22 чэрвеня 2020 году Лукашэнка пааабяцаў правесьці рэфэрэндум наконт лёсу заводу пасьля прэзыдэнцкіх выбараў.
  • 15 сакавіка 2021 году завод увялі ў эксплюатацыю. У правядзеньні рэфэрэндуму актывістам адмовілі.