Участковы Ленінская РАУС маёр Вячаслаў Пясецкі вярнуў берасьцейцу Канстанціну Астапуку ляльку ліса, якую супрацоўнікі міліцыі забралі як рэчавы доказ падчас затрыманьня аніматара.
Што адбылося?
Супрацоўнікі міліцыі 11 лістапада пасьля акцыі супраць будаўніцтва акумулятарнага заводу пад Берасьцем затрымалі Канстанціна Астапука ў касьцюме ліса. Ён гуляў зь дзецьмі, раздаваў ім паветраныя шары.
Як паведаміў Свабодзе Канстанцін Астапук, ён зьвярнуўся ў Ленінскі РАУС, з просьбай вярнуць касьцюм ліса, бо 11 студзеня скончыўся тэрмін захоўваньня рэчавых доказаў у адміністрацыйным працэсе. У міліцыі берасьцейцу паведамілі, што не знайшлі складу злачынства і вярнулі галаву ліса. Цяпер Астапук чакае пісьмовага адказу ад Ленінскага РАУС, каб пасьля падаць у суд:
«Я ж суткі адсядзеў, незаконна быў затрыманы атрымоўваецца».
Ноч пасьля затрыманьня Астапук правёў у ізалятары часовага ўтрыманьня.
Некаторыя актывісты выказалі думку, што такім чынам адбыўся «тролінг» уладаў, якія не выходзяць на плошчу да пратэстоўцаў. Справа ў тым, што старшыню Берасьцейскага аблвыканкаму клічуць Анатоль Ліс.
Пратэсты супраць акумулятарнага заводу ў Берасьці. Што важна ведаць
- Завод пабудавалі каля вёсак Хабы, Шчэбрын і Тэльмы-2, што пад Берасьцем. За два кілямэтры — рака Мухавец. Афіцыйная экалягічная экспэртыза прагназавала, што ўзьдзеяньне заводу на асяродзьдзе і чалавека будзе нязначнае. Аднак людзі ўсё роўна баяцца, што выкіды з заводу падарвуць ім здароўе.
- Пратэсты супраць акумулятарнага заводу ў Берасьці трывалі ад пачатку 2018 году, калі людзі даведаліся пра будоўлю. Праціўнікі заводу лічаць вытворчасьць «бруднай» і небясьпечнай, заяўляюць пра парушэньні працэдураў будаўніцтва.
- Штонядзелі пратэстоўцы выходзілі на цэнтральную плошчу ў Берасьці. Блогераў і актывістаў затрымлівалі, выносілі ім папярэджаньні, штрафавалі і абавязвалі выбачыцца за відэа пра акумулятарны завод.
- Актывісты сабралі больш за 37 тысяч подпісаў супраць заводу ды накіравалі іх у адміністрацыю Лукашэнкі ў лютым 2018 году. Аднак урадавая камісія ня выявіла парушэньняў у рэалізацыі праекту па будаўніцтве заводу.
- У траўні 2018 году актывісты накіравалі ў адміністрацыю прэзыдэнта больш за 2,5 тысячы подпісаў за адстаўку чыноўнікаў Берасьця, бо тыя «ігнаруюць інтарэсы жыхароў Берасьцейскага рэгіёну і сьвядома заплюшчваюць вочы на шкоду ад заводу».
- У верасьні 2018 году на будоўлі заводу выявілі парушэньні пажарнай бясьпекі.
- У чэрвені 2019 году падчас пусканаладачных работ на заводзе зафіксавалі перавышэньне забруджвальных выкідаў у атмасфэрнае паветра.
- 14 чэрвеня старшыня Берасьцейскага аблвыканкаму Анатоль Ліс прыпыніў будаўніцтва заводу да ліквідацыі выяўленых парушэньняў.
- У ліпені 2019 праект акумулятарнага завода атрымаў адмоўнае заключэньне дзяржаўнай экалягічнай экспэртызы, У Мінпрыроды паведамілі, што прычынай стала прадстаўленьне недакладных дадзеных. У жніўні праектную дакумэнтацыю паўторна падалі на экспэртызу, але пазьней кампанія адклікала дакумэнты «па прычыне неабходнасьці ўсебаковага і больш поўнага адлюстраваньня інфармацыі аб унесеных зьменах».
- 24 лютага 2020 году праектную дакумэнтацыю акумулятарнага завода пасьля карэкціроўкі зноў падалі на дзяржаўную экалягічную экспэртызу. Грамадзкая экспэртыза, якую даручаў правесьці Лукашэнка, правалілася.
- 22 чэрвеня 2020 году Лукашэнка пааабяцаў правесьці рэфэрэндум наконт лёсу заводу пасьля прэзыдэнцкіх выбараў.
- 15 сакавіка 2021 году завод увялі ў эксплюатацыю. У правядзеньні рэфэрэндуму актывістам адмовілі.
