«Цяпер можаце ня толькі курыць, але і свабодна дыхаць — паехаў ён», — сказалі міліцыянты людзям у цэнтры гораду, калі картэж Лукашэнкі накіраваўся на «Гомсельмаш».
10 жніўня ў Гомель прыбыў Аляксандар Лукашэнка. Пад ягоны візыт цэнтар гораду два разы рамантавалі.
У пятніцу на кожным скрыжаваньні ў цэнтры гораду стаялі супрацоўнікі ДАІ, рух па некаторых вуліцах быў перакрыты. З-пад адзеньня некаторых «звычайных мінакоў» гучалі перамовы па рацыі.
Канцэнтрацыя міліцыі і «людзей у цывільным» была асабліва падвышаная ля новага абласнога дзіцячага шпіталя, які нядаўна быў рэканструяваны на загад Аляксандра Лукашэнкі. Менавіта сюды ён і прыбыў.
Верталёт Лукашэнкі прызямліўся на пляцоўцы каля Лугавой вуліцы у 11:30. А 12-й картэж бачылі каля дзіцячага шпіталя на вуліцы Жаркоўскага.
Гэтую вуліцу цалкам перакрылі для руху транспарту. Пешаходам дазвалялі хадзіць толькі па супрацьлеглым ад шпіталя боку.
Перакрытая вуліца ў цэнтр Гомля падчас візыту Лукашэнкі
Таксама людзей прасілі не затрымлівацца на рагу вуліц Жаркоўскага і Савецкай.
Людзі пра Лукашэнку: «На чорта ён нам здаўся»
У сквэры імя Андрэя Грамыкі, насупраць дзіцячага шпіталя, газон быў скошаны амаль да голай зямлі. Тут сядзела кампанія дворнікаў. Выявілася, што яны вартуюць.
«А раптам які несумленны грамадзянін кіне недакурак, а прэзыдэнт убачыць — вось вартуем тут», — сказаў адзін зь іх.
У тым жа сквэры журналісты спыталі ў пэнсіянэрак, якія сядзелі на лаўках: «Хочаце прэзыдэнта ўбачыць?»
«На чорта ён нам здаўся, мы яго кожны дзень па тэлевізары бачым, а тут нам не дадуць на яго паглядзець!», — адказалі жанчыны.
Аляксандар Лукашэнка падчас візыту ў Гомель
А 13:00 рух па вуліцы Савецкай быў перакрыты — з шпіталя выехаў картэж, паехаў на «Гомсельмаш».
— Тут можна пакурыць? — запыталіся людзі ў міліцыянта, які вартаваў вуліцу Жаркоўскага.
— Цяпер можна ня толькі курыць, але і свабодна дыхаць, і нават выпіць піва — ён паехаў ужо, — адказаў міліцыянт.
Лукашэнка ў Гомлі правярае: як выканалі яго даручэньні па рэканструкцыі дзіцячай бальніцы і стварэньні супэркамбайна. Новую тэхніку на «Гомсельмашы» стварылі ў чэрвені 2018 году. Супэркамбайн — палепшаная вэрсія «КЗС-2124», які ўжо працуе на сёлетнім жніве.
Лукашэнка не прыехаў. Але Гомель атрымаў новую бальніцу, туі ў бочках і плітку
Мінулы раз Лукашэнку чакалі ў Гомлі 27 ліпеня, але тады ён не прыехаў і некалькі дзён не зьяўляўся на публіцы. Пасьля гэтага пайшлі чуткі пра інсульт у Лукашэнкі. Іх абвергла ягоная прэсавая сакратарка.