Легкавы аўтамабіль, на які наехала БМП, атрымаў мэханічныя пашкоджаньні, а ягонаму кіроўцу аказана дапамога. Пра гэта гаворыцца на сайце Міністэрства абароны.
«Пагрозы для яго жыцьця няма», — гаворыцца ў паведамленьні.
Якія пашкоджаньні атрымаў пацярпелы мужчына, не ўдакладняецца.
Паводле афіцыйнай інфармацыі, «мэханік-кіроўца баявой машыны пяхоты, якая рухалася ў складзе арганізаванай калёны вайсковай тэхнікі, ня справіўся з кіраваньнем і зьдзейсьніў сутыкненьне зь легкавым аўтамабілем».
Здарэньне адбылося каля 16:30 22 чэрвеня на скрыжаваньні дарог у раёне АЗС Ласосна на ўскрайку Горадні.
У прычынах ДТЗ разьбіраюцца прадстаўнікі ДАІ і ВАІ.
Шкода, нанесеная ў выніку ДТЗ, будзе кампэнсаваная ў адпаведнасьці з заканадаўствам.