У пятніцу раніцай прайшла першая сустрэча лідэраў Паўднёвай і Паўночнай Карэі ў рамках міжкарэйскага саміту, які павінен стаць папярэднім крокам перад сустрэчай прэзыдэнта ЗША і лідэра Паўночнай Карэі, якую плянуюць правесьці ў канцы траўня.
Кіраўнік Паўночнай Карэі Кім Чэн Ын абвясьціў пра «пачатак новай гістарычнай эпохі сьвету» пасьля абмену поціскамі рукі з прэзыдэнтам Паўднёвай Карэі Мун Чжэ Інам. Сустрэча двух лідэраў праходзіць на тэрыторыі Паўднёвай Карэі ў дэмаркацыйнай лініі ў вёсцы Панмунджом.
Кім Чэн Ын (зьлева) і Мун Чжэ Ін
Кім Чэн Ын стаў першым паўночнакарэйскім лідэрам, які ступіў на на зямлю Рэспублікі Карэя з моманту перамір’я ў Карэйскай вайне, якое заключылі ў 1953 годзе. Мун Чжэ Ін аддаў належнае свайму госьцю за гэта «мужнае і няпростае рашэньне». Апошні міжкарэйскі саміт адбыўся 11 гадоў таму.
Галоўнымі на парадку цяперашняга саміту зьяўляюцца пытаньні ператварэньня Карэйскага паўвострава ў бязьядзерную зону і падпісаньня мірнага пагадненьня паміж дзьвюма карэйскімі дзяржавамі. Кім Чэн Ын у апошнія дні шмат кажа пра дэнуклеарызацыю сваёй краіны, але што канкрэтна ён мае на ўвазе пад гэтым, ня ясна.
Паўднёвакарэйскія прыхільнікі мірнай дамовы з Паўночнай Карэяй праводзяць дэманстрацыю ў падтрымку міжкарэйскага саміту
Мун Чжэ Ін спадзяецца, што посьпех міжкарэйскага саміту закладзе аснову для прадуктыўнай сустрэчы Кім Чэн Ына і Дональда Трампа, прызначанай на канец траўня — пачатак чэрвеня.
На мінулым тыдні Паўночная Карэя абвясьціла аб прыпыненьні сваіх ракетна-ядзерных выпрабаваньняў, заявіўшы аб іх «шчасным завяршэньні».