Паводле стану на 14.00 26 сакавіка ў Савецкім раённым судзе Менску не пачаліся суды над актывістамі, затрыманымі 25 сакавіка на плошчы Якуба Коласа.
Паводле зьвестак праваабарончага цэнтру «Вясна», у гэты суд на 12 гадзін былі выкліканыя 14 чалавек. Сярод іх заяўнікі недазволенага шэсьця ад плошчы Якуба Коласа да опэрнага тэатру Сяргей Спарыш і Валянцін Троцкі, праваабаронца Наста Лойка, Галіна Цярэнцьева.
Напярэдадні ў Савецкім РУУС Менску на ўсіх іх былі складзеныя пратаколы за ўдзел у несанкцыянаванай масавай акцыі, але судовы канвэер да абеду так і не запрацаваў.
«Прашу разыходзіцца, судоў сёньня ня будзе, бо пратаколы не дастаўленыя зь міліцыі», — абвясьціла былым затрыманым і журналістам сакратар суду.
Інфармацыю сакратара пацьвердзіў супрацоўнік Савецкага РУУС Цімур Кісель, які прысутнічаў у судзе. Час, калі зь міліцыі будуць дастаўленыя пратаколы на затрыманых, міліцыянт не паведаміў.
Паводле праваабаронцаў, усяго 25 сакавіка падчас падзей, зьвязаных са сьвяткаваньнем 100-х угодкаў БНР у Менску, было затрымана ад 60 чалавек, у рэгіёнах — яшчэ 50. У Менскай гарадзкой міліцыі дагэтуль не назвалі колькасьць затрыманых 25 сакавіка.
Усё, што трэба ведаць пра Дзень Волі — 2018
Санкцыянаванае ўладамі «Сьвята Незалежнасьці» прайшло 25 сакавіка каля менскага Опэрнага тэатру, на Траецкай гары. Паводле розных ацэнак, мітынг-канцэрт наведалі 40-50 тысяч чалавек. На сьвяце выступілі Ігар Варашкевіч і Кася Камоцкая, дачка Лявона Вольскага Адэля, рок-гурты Akute, Dzieciuki і іншыя. Мітынг-канцэрт быў дазволены менскімі ўладамі, але міліцыя затрымлівала тых, хто падыходзіў да пляцоўкі або выходзіў зь яе зь бел-чырвона-белымі сьцягамі. Да канцэрту была спроба правесьці несанкцыянаванае шэсьце ад плошчы Якуба Коласа, затрымалі дзясяткі чалавек. Агулам па краіне былі затрыманыя больш за 100 чалавек. Розныя імпрэзы 25 сакавіка прайшлі ў дзясятках гарадоў Беларусі, а таксама ў іншых краінах па абодва бакі Атлянтычнага акіяну.