Праўладную арганізацыю «Белую Русь» узначаліў кіраўнік Белтэлерадыёкампаніі Генадзь Давыдзька. За яго прагаласавалі ўсе сябры савета «Белай Русі».
Былы кіраўнік «Белай Русі» Аляксандар Радзькоў, які ўзначальваў арганізацыю ад самага заснаваньня ў 2007 годзе, застаецца ў яе савеце.
Падчас зьезду Давыдзька пракамэнтаваў Свабодзе пэрспэктывы пераўтварэньня «Белай Русі» ў партыю.
«Не насьпеў яшчэ час. І потым палітычныя партыі змагаюцца за ўладу, а «Белая Русь» павінна заставацца грамадзкай арганізацыяй, якая падтрымлівае стабільнасьць, незалежнасьць, дзяржаўнасьць. Гэта галоўнае», — сказаў Давыдзька.
Паводле новага лідэра «Белай Русі», «яе прынцыповы статус дае магчымасьці зьбіраць нават партыйныя думкі на грамадзкай глебе».
Новы кіраўнік «Белай Русі» пра беларускую мову, нацыянальны ўнівэрсытэт і працу па начах
Зьезд праўладнага аб’яднаньня «Белая Русь» у фотарэпартажы Свабоды
Генадзь Давыдзька на зьезьдзе «Белай Русі»
Хто такі Давыдзька — актор Купалаўскага і кіраўнік БТ
Генадзю Давыдзьку 62 гады, ён родам зь Сянно Віцебскай вобласьці. Давыдзька вучыўся ў Дальнеўсходнім пэдагагічным інстытуце мастацтваў у расейскім Уладзівастоку, затым у Беларускай акадэміі мастацтваў.
Пачаў працаваць артыстам Арэнбурскага драмтэатру ў савецкай Расеі, адслужыў у савецкім войску, затым стаў артыстам Магілёўскага абласнога тэатру драмы і камэдыі, пасьля — у Купалаўскім тэатры.
Урэшце ў 1997 годзе стаў дырэктарам Купалаўскага тэатру, быў ім да 2004 году, пакуль не абраўся дэпутатам у Палату прадстаўнікоў, у якой прабыў два тэрміны (у якасьці дэпутата заклікаў у тым ліку да легалізацыі прастытуцыі).
З канца 2010 году працуе старшынём дзяржаўнай Белтэлерадыёкампаніі — у яе ўваходзяць «нумарныя» тэлеканалы «Беларусь» («Беларусь-1», «Беларусь-2» і так да 5 і міжнародны 24), а таксама «НТВ-Беларусь», радыёстанцыі «Першы Нацыянальны канал», «Культура», «Сталіца», «Радыюс-FM» і міжнароднае радыё «Беларусь», а таксама Агенцтва тэлевізійных навінаў. Прызначыў Давыдзьку асабіста Аляксандар Лукашэнка.
Адзін зь першых праектаў Давыдзькі на БТ — прапагандысцкі фільм «Плошча. Жалезам па шкле», дзе ён выступіў дыктарам. Пры ім БТ дагэтуль здымае прапагандысцкія фільмы, як то нядаўнія «Званок сябру» і «Белы легіён чорных душаў».
У красавіку ў розных месцах Менску, у тым ліку на фоне будынку Белтэлерадыёкампаніі, зьявіліся выявы кіраўніка Белтэлерадыёкампаніі Генадзя Давыдзькі ў выглядзе тэлепузіка. Аўтары гэтых вулічных партрэтаў называлі іх адказам на прапагандысцкую кампанію на беларускім тэлебачаньні, накіраваную супраць іншадумцаў, якім не даецца слова.
Таксама Давыдзька — старшыня праўладнай асацыяцыі «Беларуская канфэдэрацыя творчых саюзаў».