Часопіс паведамляе пра канфідэнцыйны брыфінг расейскага вайсковага аташэ, які адбываўся ў Бэрліне 19 верасьня, у перадапошні дзень вучэньняў «Захад-2017». Вайскоўцы і дыпляматы, якія прысутнічалі на брыфінгу, «чакалі пачуць падрабязнасьці аб вучэньнях "Захад-2017". Аднак замест гэтага расейскі вайсковы аташэ заявіў аб тым, што вялікія манэўры, якія выклікалі рэзананс, будуць праводзіцца часьцей, чым было дагэтуль», — піша часопіс.
Паводле афіцыйных дадзеных, у манэўрах удзельнічала 12,7 тыс. вайскоўцаў — пры такой колькасьці запрашэньне заходніх назіральнікаў было неабавязковым.
Аднак паводле зьвестак выданьня, у NATO гэтыя дадзеныя выклікаюць сумневы. Дарэчы, сёньня генэральны сакратар альянсу Енс Столтэнбэрг публічна абвінаваціў Расею ў перавышэньні колькасьці ўдзельнікаў вучэньняў у параўнаньні з афіцыйна абвешчанай.
Der Spiegel спасылаецца на сакрэтны аналіз, згодна зь якім у трэніровачных мерапрыемствах, якія папярэднічалі вучэньням і праводзіліся ў некаторых абласьцях Беларусі, было задзейнічана, якнайменей, 60 тысячаў вайскоўцаў. «Дакумэнт абапіраецца перадусім на даволі дакладныя здымкі са спадарожнікаў, якія часткова былі прадстаўленыя бундэсвэрам», — гаворыцца ў артыкуле.
«Прыкладна праз два тыдні ў Бруселі зьбяруцца міністры замежных справаў краінаў NATO — і там тэмай абмеркаваньня зноў будзе стаўленьне да Расеі. Падставай паслужыў яшчэ адзін сакрэтны даклад пра абароназдольнасьць альянсу ў выпадку сапраўднай канфрантацыі з Расеяй, у якім ідзе гаворка пра значныя прабелы і неабходнасьць фармаваньня новай каманднай структуры ў Эўропе», — заключае Der Spiegel.