Тэрмін дзеючых санкцый ЭЗ супраць Расеі заканчваецца 31 ліпеня.
Рашэньне працягнуць санкцыі было ўзгодненае пасьля таго, як канцлер Нямеччыны Ангела Мэркель і нядаўна абраны прэзыдэнт Францыі Эмануэль Макрон распавялі іншым кіраўнікам краінаў ЭЗ пра працэс урэгуляваньня сытуацыі ва Ўкраіне ў рамках менскіх пагадненьняў.
19 чэрвеня кіраўнікі зьнешнепалітычных ведамстваў краінаў ЭЗ працягнулі санкцыі, зьвязаныя з анэксіяй Крыму, якія прадугледжваюць забарону на інвэстыцыі ў рэгіён і гандаль зь ім.
Напярэдадні аб пашырэньні санкцыйнага сьпісу на 38 пазыцыяў абвясьцілі ЗША. Амэрыканскае казначэйства ўключыла ў яго расейскія кампаніі і шэраг публічных асобаў.
ЗША, як і Эўропа, лічаць, што ўлады Расеі нясуць адказнасьць за адсутнасьць прагрэсу ва ўрэгуляваньні канфлікту на ўсходзе Ўкраіны. Яны заклікаюць Маскву аказаць уплыў на самаабвешчаныя рэспублікі з мэтай доўгачасовага спыненьня баявых дзеяньняў і пачатку палітычнага дыялёгу.