Адну зь лідэраў берасьцейскіх «Маршаў недармаедаў» Натальлю Папкову затрымалі на чыгуначным вакзале ў Берасьці.
Як паведаміў Свабодзе берасьцейскі праваабаронца Раман Кісьляк, Натальлю даставілі ў Ленінскі РАУС:
«Затрымалі супрацоўнікі ў форме а 11.30 на чыгуначным вакзале і даставілі ў Ленінскі РАУС. Яна зьбіралася ехаць у Менск, каб прыняць удзел у акцыі 25 сакавіка. Гэта прэвэнтыўнае затрыманьне перад акцыяй. За што яе затрымалі, гэта ўжо будзе вядома пазьней», — сказаў праваабаронца.
Натальлю Папкову будуць судзіць сёньня ў Ленінскім судзе Берасьця а 14 гадзіне, паведаміў Раман Кісьляк.
Актывістка «Маладой Беларусі» Натальля Папкова — адна зь лідэраў пратэстаў недармаедаў у Берасьці.
Натальля Папкова на «Маршы недармаедаў» у Берасьці 26 лютага
3 сакавіка, перад трэцім «Маршам недармаедаў» у Берасьці (5 сакавіка), яе затрымалі і зьмясьцілі ў псыхіятрычную лякарню, быццам бы пасьля скаргі суседзяў, што яна хоча скончыць жыцьцё самагубствам.
Пасьля вызваленьня ў інтэрвію Свабодзе Натальля распавяла, што думак пра самагубства ў яе не ўзьнікала.