Віктар Марчык, адзін са слонімскіх актывістаў, які займаецца зборам подпісаў за наданьне адной з вуліц імя Івана Шэгі, распавядае, што на іх ініцыятыву найперш адгукнуліся слонімцы, якія добра ведалі доктара Івана Шэгу.
— Мы далі толькі абвестку ў інтэрнэце, што зьбіраем такія подпісы, і адразу пачаліся тэлефанаваньні. Дык пакуль ходзім толькі да тых, хто нам патэлефанаваў. Гэта розныя людзі, прычым сярод іх і калегі спадара Шэгі, некаторыя нават самі ўзялі падпісныя лісты і зьбіраюць подпісы. Хто ведаў Івана Шэгу асабіста, вельмі цёпла пра яго згадваюць.
Паводле Марчыка, неабходна сабраць 200 подпісаў дзеля таго, каб у выканкаме разгледзелі іхную ініцыятыву. Але ён кажа, што подпісаў зьбяруць больш за дзьвесьце, а потым панясуць здаваць у райвыканкам.
— Мне нават зь іншых гарадоў людзі тэлефанавалі, калі пабачылі абвестку ў інтэрнэце. І самае цікавае, што яшчэ ніводзін са слонімцаў, да якіх зьвярталіся па подпіс нашы валянтэры, не запытаўся, хто такі Шэга. У нас горад невялікі, а доктара Шэгу ведалі ўсе. Ён заўсёды з павагай ставіўся да людзей, і гэтым самым яны адказваюць яму. Паглядзім толькі, як на нашу ініцыятыву адрэагуюць улады.
Доктар Іван Шэга быў сябрам сойму Партыі БНФ, спэцыялістам вышэйшай катэгорыі, які адпрацаваў траўматолягам у Слонімскай раённай бальніцы 30 гадоў.
Улетку 2013 году Шэга быў звольнены, як меркавалі яго аднапартыйцы, з палітычных матываў, хоць кіраўніцтва бальніцы гэта адмаўляла. Пасьля звальненьня заснаваў недзяржаўную установу «Шэгамэдкансульт».
Іван Шэга памёр 4 кастрычніка 2016 году ў Слоніме ад цяжкага анкалягічнага захворваньня. Яму было 63 гады.