Паводле экзыт-полу, дзейны прэзыдэнт Польшчы Браніслаў Камароўскі набраў у другім туры выбараў 47% галасоў, яго супернік Анджэй Дуда 53%.
Кандыдат ад апазыцыйнай партыі «Права і справядлівасць» (PiS) Анджэй Дуда атрымлівае перамогу ў другім туры выбараў прэзыдэнта Польшчы, набраўшы 53% галасоў.
Пра гэта сьведчаць дадзеныя экзыт-полу, абнародаванага ў эфіры польскага тэлеканалу TVP.
Паводле папярэдніх вынікаў, дзейны прэзыдэнт Браніслаў Камароўскі набраў 47%.
Адзначаецца, што хібнасьць вынікаў экзыт-полу складае 2%.
Анджэй Дуда — юрыст і палітык. Дэпутат Эўрапейскага парлямэнту з 2014 году. У 1996 годзе скончыў факультэт права і адміністрацыі Ягелёнскага ўнівэрсытэту ў Кракаве. У студзені 2005 году атрымаў ступень доктара права. Зь 2006 па 2007 год быў намесьнікам дзяржсакратара ў Міністэрстве юстыцыі. Былы статс-сакратар ў канцылярыі прэзыдэнта Польшчы Леха Качыньскага (2008-2010), дэпутат Сэйму Польшчы (2011-2014).
У студзені 2015 году Анджэй Дуда выказаўся за польскую вайсковую падтрымку ўкраінскай арміі ў Данбасе. Падчас перадвыбарчай кампаніі Аджэй Дуда падкрэсьліваў, што аб’яднаная Эўропа павінна прыкласьці ўсе намаганьні, каб Расея пакінула захопленыя ўкраінскія тэрыторыі ўключна з Крымам.