Сяргей Прылуцкі (Пістончык) нарадзіўся ў 1980 у Берасьці. Аўтар кнігі вершаў «Дзевяностыя forever» (2008), кнігі дэгенэратыўнай прозы «Йопыты дзьвух маладых нелюдзяў» (пад псеўданімам Сірошка Пістончык у суаўтарстве з Уласікам Смаркачом, 2009). Перакладае з украінскай, польскай і ангельскай моваў. У 2014 выйшла кніга вершаў «Герой эпохі стабільнасьці» і кніга Пістончыка «Дэгенератыўны слоўнік».
1. Для каго вы пішаце? (Хто ваш ідэальны чытач?)
Ніколі ня мог з упэўненасьцю адказаць на гэтае пытаньне. Мабыць, таму, што яно адначасна і дурацкае, і мэтафізычнае.
2. Дзе вам найлепш пішацца, і калі?
Уначы дома і ў маршрутцы ці ў мэтро ўдзень.
3. Аўтарам якой ужо напісанай кнігі вы хацелі б быць?
Гашакаўскага «Швэйка» або «Гарганцюа і Пантагруэля» Рабле – уяўляю як іх каўбасіла падчас напісаньня. З сучасных, мабыць, «Кіслотны дом» Уэлша (тут ужо цяжка сказаць, ці каўбасіла аўтара, а калі каўбасіла, то ад чаго).
4. Які літаратурны герой найбольш падобны да вас?
Карлсан – вялікі аматар падурыцца, бутэрбродаў з тлустай каўбасой і пажартаваць.
5. Хто ваш улюбёны пісьменьнік?
Ніколі ня мог назваць найулюбёнейшага пісьменьніка, бо кандыдатуры на гэтае месца пэрыядычна мяняюцца. Зараз гэта, напэўна, Гашак. Год назад я, мабыць, назваў бы Эміля Чарана з Джані Радары.
6. Што вы цяпер чытаеце?
Як заўсёды, паралельна некалькі кніжак: Аляксандар Кабанаў «Волхвы в планетарии»; Земавіт Шчэрэк «Прыйдзе Мордар і нас зьесьць»; Сяргей Пясэцкі «Роўныя начным багам».
7. На якіх замежных мовах (расейская ня лічыцца) вы можаце чытаць?
На ўкраінскай, польскай, вельмі марудна і са слоўнікам – на ангельскай.
8. Якая ваша найбольш улюбёная кніга з напісаных вамі?
Кніга хуліганскіх дзіцячых вершаў, якая яшчэ ня выйшла, пад рабочай назвай «Далоў дарослых».
9. Якую кнігу вам яшчэ хочацца напісаць?
Тую, якую хачу – пішу зараз. Там такая сабе сумесь праўды жыцьця, зомбі-апакаліпсіса і іроніі. Прынамсі, агульная задума такая.
10. Калі вы адчуваеце сябе найбольш свабодным?
Калі падарожнічаю з купай ідэй у галаве.
***
Каб яшчэ больш зацікавіць вас беларускім прыгожым пісьменствам, рэдакцыя Радыё Свабода прыдумала міні-апытанку для пісьменьнікаў. Мы вырашылі пачаць яе ад “шорт- і лонг-лістараў“ сёлетняй прэміі імя Гедройця, паколькі ўсе яны цяпер на слыху. Але з часам мяркуем прапанаваць гэтую забаву шырэйшаму творчаму колу ў Беларусі.