Сёньня вечарам у Вільні, у Siemens Arena, адбудзецца канцэрт гурту «Ляпіс Трубяцкі» з прэзэнтацыяй альбому «Грай».
На беларуска-літоўскай мяжы зноў затор. Гэтым разам стаяць пасажырскія аўтобусы.
Нашая карэспандэнтка Іна Студзінская, якая кіруецца на канцэрт «Ляпіса» ў Вільню, паведаміла, што дзясятак аўтобусаў, якія дадаткова выдзеліў «Менсктранс» з нагоды канцэрту «Ляпіса» ў Вільні, не прапускаюць зь літоўскага боку. Маўляў, беларускі бок не паінфармаваў літоўскіх памежнікаў.
Пры гэтым звычайныя рэйсавыя аўтобусы прайшлі мяжу бесьперашкодна.
Так, ахвотныя трапіць на канцэрт, стаяць ужо на мяжы больш за 3 гадзіны, паведамляе Іна Студзінская.
Мяркуецца, што ўдзел у сёньняшнім канцэрце возьмуць да 10 тысячаў чалавек, бальшыня прыедзе зь Беларусі. Менавіта з гэтым зьвязваюць доўгія чэргі на беларуска-літоўскай мяжы, якія ўтварыліся літаральна ў апошнія дні.
У сувязі зь беспрэцэдэнтным попытам на квіткі, нават дзяржаўныя транспартныя прадпрыемствы вылучылі дадатковыя аўтобусы. Так месяц таму «Менсктранс» паведаміў, што «ў сувязі з правядзеньнем у Вільні 30.11.2013 сольнага канцэрту гурту «Ляпіс Трубяцкі» дзяржаўнае прадпрыемства «Менсктранс» выдзяляе звыш 8 (васьмі) дадатковых аўтобусаў, яшчэ 2 (два) дадатковыя аўтобусы па міжнародным маршруце «Менск — Вільня — Мінск». У інфармацыі на сайце прыводзіўся і графік руху аўтобусаў.
