Баршчэўскі: Заклікаю ўсе адгалінаваньні БНФ зноў аб’яднацца
Лявон Баршчэўскі
На сайце Свабоды прайшла онлайн-канфэрэнцыя. На вашы пытаньні адказаў былы старшыня БНФ Лявон Баршчэўскі.
19 кастрычніка адзначаецца 25-годзьдзе ўтварэньня БНФ. Аргкамітэт Беларускага Народнага Фронту за перабудову «Адраджэньне» быў створаны 19 кастрычніка 1988 году на сходзе ў Чырвоным Касьцёле ў Менску. Устаноўчы зьезд адбыўся ў Вільні 24–25 чэрвеня 1989 году.
Лявон Баршчэўскі ў 1990–1995 гадах быў дэпутатам Вярхоўнага Савету XII скліканьня, уваходзіў у склад парлямэнцкай апазыцыі БНФ. З 1995-га — намесьнік старшыні Беларускага Народнага Фронту «Адраджэньне», у 1996–1999-м выконваў абавязкі старшыні партыі пасьля эміграцыі Зянона Пазьняка. На X зьезьдзе Партыі БНФ у сьнежні 2007 году Лявон Баршчэўскі абраны старшынём партыі. У верасьні 2009 году сышоў з пасады старшыні, на якой яго па выніках зьезду партыі замяніў Аляксей Янукевіч. У 2011 годзе разам з групай паплечнікаў выйшаў з Партыі БНФ.
