У конкурсе «Свабоды» перамагла 5-гадовая дзяўчынка

Паводле галасаваньня, найбольшую колькасьць галасоў атрымалі:

Мікалай Кудласевіч (малюнак нумар 3) — 238
Яраслава Аляксандрава (малюнак нумар 11) — 152
Вадзім Пракопчык (нумар 22) — 125


Прызы было вырашана разьмеркаваць наступным чынам:

Пляншэт Prestigio MultiPad PMP 5080 — атрымае Вадзім Пракопчык за дзьве выдатныя працы, якія ўвайшлі ў шорт-ліст.

Электронная кніга Amazon Kindle — атрымае пяцігадовая Яраслава Аляксандрава, каб чытала кніжкі «Свабоды» і ўдзельнічала ў наступных конкурсах

І прыз глядацкіх сымпатыяў плэер Apple IPod shuffle 2gb — дастанецца фаварыту інтэрнэт-аўдыторыі Мікалаю Кудласевічу за фотаздымак дзяўчыны.

Фотаздымак Мікалая Кудласевіча атрымаў беспрэцэдэнтную колькасьць галасоў

Яраслава Аляксандрава атрымае электронную кнігу Amazon Kindle

УПАДАБАНЬНІ СЯБРАЎ ЖУРЫ

(клікніце два разы на карцінкі, каб паглядзець іх у поўным памеры)

СЯРГЕЙ НАВУМЧЫК:

Аўтар Вольга Смыкоўская

>> Выява Вольгі Смыкоўскай (нумар 16) — там, дзе да неба прабіваецца парастак, а пад зямлёй у яго — магутныя карані. Сымболіка тут зразумелая і цалкам слушная, мне тут бачыцца тое, што мы ўкладаем у паняцьце «Беларушчына», што, магчыма, выглядае кволым, але мае трывалае гістарычнае апірышча. Да таго ж, праца Вольгі зробленая прафэсійна — гатовы плякат: яго можна адразу выдаваць паліграфічным накладам.

Аўтар Аляксандар Пуставітаў

>> Прафэсійны і плякат Аляксандра Пуставітава (нумар 7), прысьвечаны Каліноўскаму, зь вельмі цікавай, сэнсавай прапрацоўкай фону (па манэры ён нечым мне нагадаў творы Барыса Заборава, які выкарыстоўвае для сваіх палотнаў старыя здымкі).

Аўтар Марта Філіпоненка

>> Дэматыватар Марты Філіпоненкі «Беларусы ў 1963 годзе — Беларусы зараз» (нумар 26). Магчыма, занадта схематычна, але праўдзіва адлюстраваная галоўная (ці адна з галоўных, пасьля нізкай нацыянальнай сьвядомасьці) праблема сучаснага грамадзтва: замбаваньне афіцыйнай прапагандай.

Аўтар Шэры Воўк

І, нарэшце, дэматыватар аўтара пад псэўданімам «Шэры воўк» — «Што лайкнулі, тое й прыляпілася», дзе пададзеныя паштовыя маркі, першая — між іншым, адна зь першых марак незалежнай Беларусі — зь Бел-Чырвона-Белым Сьцягам, другая — з «лукашэнкаўскім», навязаным народу ў выніку нелегітымнага рэфэрэндуму 1995 году. Калі я ўбачыў гэты дэматыватар, мне прыгадалася адна філятэлістычная гісторыя. У канцы 90-ых пасьля зьмены Канстытуцыі, якую мы назвалі дзяржаўным пераваротам, выпусьцілі маркі з партрэтам Лукашэнкі. Іх зрабілі гіганцкім накладам — потым некалькі гадоў амаль ўсе лісты, што прыходзілі да мяне зь Беларусі, былі ў канвэртах з маркай-партрэтам Лукашэнкі. Ну а ў момант, калі я ўпершыню ўзяў канвэрт з гэтай маркай, з маіх вуснаў выліліся словы, працытаваць якія тут няма ніякай магчымасьці. У той момант побач быў Сяржук Сокалаў-Воюш, і ён трансфармаваў маю рэпліку ў верш, які канчаўся словамі: «Зайздрошчу я паштовым супрацоўнікам, што б’юць па мордзе штэмпелем яго»).


ЛЯВОН ВОЛЬСКІ:

Аўтар Вадзім Пракопчык

>> Добра выкарыстаны клясычны дызайн. І назва песьні вельмі пасуе.


​

Аўтар Міхась Нарушэвіч

>> Проста і зразумела.

Аўтар Яўген Семчанка

Крэатыуны ход. Яшчэ раз падкрэсьлівае, што цікавая думка істотнейшая за выкшталцоную тэхніку.

Аўтар Вадзім Пракопчык

>> Ізноу, як у нумары 22, добрае выкарыстаньне калісьці рэвалюцыйных, а цяпер клясычных прыёмау пап-арту.













РЭСПУБЛІКА ПАЛІНА:

Аўтар Контрарт

>> Вееельмі прыгожае графіці з блізкай мне ідэяй-вобразам успрыманьня Беларусі як дзяўчыны.

Аўтар Вольга Смыкоўская

Гэты малюнак добра выкананы, трагічна і глыбока адлюстроўвае тое, што з намі адбываецца сёньня.

Аўтар Аляксей Серада

>> Цікавая ідэя з майкай. Я б такую набыла.

Аўтар Аляксей Нішкамавіч

>> Проста зроблена стылёва.











VINSENT

Аўтар Яраслава Аляксандрава

>> Калі б такіх працаў ад дзяцей было паболей, то можна было б не хвалявацца за будучыню краіны. Кажуць, што дзіцячыя малюнкі валодаюць непаўторнай энэргетыкай, і гэта адчуваецца ў працы дзяўчынкі.

Аўтар Вадзім Пракопчык

>> Падабаецца «каманда», якая намаляваная. Праца выкананая у стылі «групавы партрэт». Групавыя здымкі мне заўсёды падабаліся.