Фільм здымаўся ў Польшчы Дзяржаўнай кінастудыяй за грошы Міністэрства культуры Польшчы, Польскага інстытуту кінамастацтва і францускага Canal +.
На Канскім кінафэстывалі фільм быў паказаны двойчы ў межах кінакірмашу. 22 траўня, а 13 гадзіне ў кіно «Riviera 4», а таксама 23 траўня аб 11:30 у «Palais B».
На ўваходзе ў кіназалю кожнага наведніка паказу рэгістраваў супрацоўнік фэстывалю. Пасьля стваральнікі фільмаў могуць паглядзець, хто наведаў паказ, каб зьвязацца зь ім і заключыць дамову пра дыстрыбуцыю ці продаж.
У часопісе "Variety" было некалькі публікацыяў і рэклямных модуляў пра фільм "Жыве Беларусь". Зрэшты, гэта адзіны спосаб зацікавіць публіку фільмам. На Канскім фэстывалі паказваюць сотні фільмаў з усяго сьвету.
-Ёля Галіцкая з Польскай дзяржаўнай кінастудыі (WFDIF) адказвае за прамоцыю фільму "Жыве Беларусь". У Канах яна заключае дамовы, вядзе перамовы пра паказы і продаж фільму.
Павільён Польскага інстытуту кінамастацтва разьмешчаны на тэрасе літаральна над знакамітым чырвоным дываном. Цэлы стэнд прысьвечаны фільму "Жыве Беларусь", а па тэлевізары нон-стоп паказваюць трэйлер да фільму. Акрамя гэтага, палякі прывезьлі некалькі дзясяткаў фільмаў да продажу.
Сярод беларускіх патронаў фільму, каму значыцца падзяка ў тытрах, - Алесь Бяляцкі. Большасьць актораў - беларусы.
У фільме паказваецца шэраг праблемаў сучаснага беларускага грамадзтва, у тым ліку адсутнасьць роўнасьці дзьвюх дзяржаўных моваў. Адзін з герояў фільму Шэры (Максім Каржыцкі) адмаўляецца прымаць прысягу па-расейску.
Фільм распавядае пра беларускую моладзь. Палова фільму адбываецца ў вайсковай частцы недалёка ад чарнобыльскай зоны. У частцы пануюць антысанітарыя, дзедаўшчына, і галоўны герой Мірон Захарка пачынае весьці дзёньнік у інтэрнэце.
У мэтах прамоцыі фільму вырабленыя тысячы ўлётак. Усе зацікаўлены маглі атрымаць дэма-вэрсію фільму. Пасьля фэстывалю пачынаюць заключаць дамовы на дыстрыбуцыю, запрашаюць на фэстывалі.