Бард Зьміцер Сідаровіч прэзэнтуе працяг «Дзіцячага альбому». Праект быў запачаткаваны летась, калі выйшаў дыск «Дзіцячы альбом. Частка першая». На ім былі прадстаўленыя 27 беларускіх народных дзіцячых песьняў у арыгінальных апрацоўках. Асноўнымі выканаўцамі песьняў для дзяцей былі самі дзеці: Тамаш Сідаровіч і Адась Матафонаў.
Дыск вельмі хутка стаў папулярным сярод беларускамоўных бацькоў, выхавальнікаў дзіцячых садоў, кіраўнікоў мастацкіх калектываў. І вось завершаная праца над другой часткай.
Неўзабаве выйдзе падвоены «Дзіцячы альбом».
У другой частцы «Дзіцячага альбому» будуць прадстаўленыя ня толькі фальклёрныя песьні, але і аўтарскія — словы і музыку да іх напісаў сам Зьміцер Сідаровіч.
Пашыраецца і тэматыка: апроч традыцыйных для дзіцячага рэпэртуару твораў, пэрсанажамі якіх зьяўляюцца жывёлы і птушкі, у новым альбоме можна будзе пачуць песьні на школьную тэму, а яшчэ — жартоўныя музычныя творы, якія дапамагаюць закладаць добрыя паводзіны ў самых маленькіх слухачоў.
Склад выканаўцаў таксама стаў больш пашынаным. Сьпевакам-дзецям дапамагае цэлая каманда дарослых выканаўцаў, дзякуючы якім многія песьні пачалі гучаць, як сапраўдныя міні-спэктаклі. Асобны разьдзел новага дыску — калядныя песьні ў выкананьні Тамаша Сідаровіча і Адася Матафонава.
