Каб набыць нават невялікую суму валюты ў банкаўскіх абменьніках, многія жыхары Беларусі стаяць у чэргах дзень і ноч.
МАГІЛЁЎШЧЫНА
У Магілёве самая вялікая чарга па валюту — у абменны пункт на чыгуначным вакзале. У ёй 249 чалавек.
Працуе абменны пункт кругласутачна. Ля акенца — сьпісаны больш як напалову канцылярскі журнал з імёнамі чакальнікаў. Людзі стомленыя і негаваркія. На просьбу журналіста пагаварыць пра самаарганізацыю чаргі адгукнуліся малады спадар і спадарыня сталага веку.
Спадар: "Прыходзім а сёмай гадзіне раніцы, адзначаемся. Аб адзінаццатай вечара таксама адзначаемся. Не прыйшоў нехта — адразу выкрэсьліваем".
Спадарыня: "Па тры дні стаім, каб купіць 150 даляраў. Вось мы зь першага чысла стаім і яшчэ не купілі нічога".
За ноч толькі 8 чалавек здалі даляры, а па валюту ў чарзе — 250 чалавек
Спадарыня: "Чорны рынак", выходзіць, у нас працуе, а дзяржава не працуе".
Карэспандэнт: "Вы тут і начуеце?".
Спадарыня: "Вядома".
Увечары ў нас тут раскладанкі, зэдлікі і ўсё астатняе
Спадарыня: "Во так працуюць нашы прадпрымальнікі. Людзі, якія хочуць адпачыць, паехаць на поўдзень. Аздаравіць сваіх дзяцей".
За пятнаццаць мэтраў ад чаргі пільнуюць парадак два міліцыянты. Пытаю, ці бываюць канфлікты:
Спадар: "Бывае шмат. Бываюць і бойкі. Прыходзяць некаторыя й заяўляюць, што першыя тут стаім".
Спадарыня: "Нехта некага абразіць, штурхане. Гэта ж народ, і народ дужа розны".
У суразмоўцаў пытаюся, колькі яшчэ, на іх думку, працягнецца валютны крызіс.
Спадарыня: "Гэтае пытаньне не да нас".
Спадар: "Хутчэй, відаць, цяпер скончыцца дзяржава, чым разыдуцца чэргі. Гэта хутчэй будзе".