30 студзеня а 18-й гадзіне ля цэнтральнага ўваходу ў будынак КДБ у Менску адбылася несанкцыянаваная акцыя салідарнасьці з палітычнымі вязьнямі. Да будынку КДБ выйшлі людзі з партрэтам Андрэя Саньнікава і надпісам "Свабоду Саньнікаву", а таксама з партрэтамі некаторых іншых зьняволеных, абвінавачаных у масавых беспарадках у Менску 19 сьнежня. Міліцыя затрымала 7 чалавек.
19.00 Некаторыя ўдзельнікі акцыі ад будынку КДБ скіраваліся да Чырвонага касьцёлу. Ля помніка "Арханёл Міхал перамагае злога" яны запалілі зьнічы і павязалі бел-чырвона-белую стужку. Прысутныя трымаюць у руках партрэты зьняволеных – Насты Палажанкі, Аляксандра Фядуты, Зьмітра Бандарэнкі, Эдуарда Лобава.
18:40 Акцыя перад будынкам КДБ скончылася.
18:30 Пад'ехаў аўтазак, пастаяў некалькі хвілінаў і ад'ехаў. На месцы засталіся ўдзельнікі акцыі і міліцыянты. Людзі пакрысе пачалі разыходзіцца.
Your browser doesn’t support HTML5
Акцыя салідарнасьці 30 студзеня (Ч.1)
Your browser doesn’t support HTML5
Акцыя салідарнасьці 30 студзеня (Ч.2)
Your browser doesn’t support HTML5
Акцыя салідарнасьці 30 студзеня (Ч.3)
Your browser doesn’t support HTML5
Акцыя салідарнасьці 30 студзеня (Ч.4)
18:00 Да будынку КДБ выйшлі людзі з партрэтам Андрэя Саньнікава і надпісам "Свабоду Саньнікаву", а таксама з партрэтамі некаторых іншых зьняволеных, абвінавачаных у масавых беспарадках у Менску 19 сьнежня. Міліцыя затрымала семярых чалавек.
Сярод затрыманых Максім Вінярскі, Паліна Кур'яновіч, Леанід Кулакоў, Кацярына Людвіг і жонка Міколы Статкевіча Марына Адамовіч, якая стаяла зь яго партрэтам. Апэрацыяй кіруе палкоўнік Яўсееў.
Прыйшла маці аднаго зь вязьняў Плошчы Алена Ліхавід. Ейны сын утрымліваецца ў турме ў Жодзіне. Алену хацелі затрымаць, але людзі адбілі яе ў міліцыянтаў. Міліцыянты паводзяць сябе груба і папярэджваюць, што акцыя несанкцыянаваная.
Міліцыянты перашкаджаюць спробам людзей запаліць сьвечкі, кажучы, што гэта трэба рабіць у царкве ці на могілках. Таксама на месца акцыі прыгналі трактар чысьціць вуліцу. Тым ня менш застаецца некалькі дзясяткаў чалавек.
У турме КДБ сярод іншых знаходзяцца:
Андрэй Саньнікаў, былы кандыдат на прэзыдэнта; Мікола Статкевіч, былы кандыдат на прэзыдэнта; Аляксей Міхалевіч, былы кандыдат на прэзыдэнта; Зьміцер Бандарэнка; Аляксандар Фядута; Анатоль Лябедзька; Сяргей Марцалеў; Павал Севярынец; Аляксандар Арастовіч; Аляксандар Атрошчанкаў; Наста Палажанка.
Мінулая акцыя салідарнасьці ля цэнтральнага будынку КДБ адбылася 19 студзеня.