Расейская палітычная эліта раскалолася ў ацэнках вынікаў прэзыдэнцкіх выбараў у Беларусі. Хтосьці называе паход дзейнага кіраўніка дзяржавы на чацьвёрты тэрмін цалкам чаканым, іншыя лічаць, што Аляксандар Лукашэнка чарговым разам скраў у беларусаў перамогу, пазбавіўшы іх выбару.
Амбасадар Расеі ў Беларусі Аляксандар Сурыкаў адносна мінулых выбараў заявіў, што перамога Аляксандра Лукашэнкі — цалкам лягічная. На яго думку, электаральнае поле — пэнсіянэры, сельскае насельніцтва, войска, праваахоўная сыстэма — забясьпечвае дзейнай уладзе 50-55%. Плюс частка інтэлігенцыі, моладзі. Як выказаўся Сурыкаў, «мы чакалі за 70% за Лукашэнку, так і адбылося». Дыплямат перакананы, што падобны расклад разумела і апазыцыя:
«Ад самага пачатку стаўка рабілася на Плошчу. Яны разумелі, што ня могуць выйграць, таму была спроба правесьці варыянт „жоўты“, „памаранчавы“, які заўгодна. А галоўная мэта, напэўна, „засьвяціцца“ ў непрызнаньні Захадам выбараў у Беларусі. Чым гэта скончылася — вы ведаеце, бо на плошчу ішлі любым шляхамі, нават не запытаўшыся права на правядзеньне мітынгу, ніхто гэтым нават не азадачыўся. Мы ўсё разумеем, можам паспачуваць людзям, якія ў выніку пацярпелі. Але само па сабе зьяўленьне чалавека на несанкцыянаваным мітынгу — гэта ўжо адміністратыўнае парушэньне.
Мы чакалі за 70% за Лукашэнку, так і адбылося.
Між тым Сурыкаў адзначыў, што напярэдадні самых чаканых у годзе сьвятаў беларускім уладам трэба было б праявіць міласэрнасьць і зьмякчыць пакараньне затрыманым.
Your browser doesn’t support HTML5
Расейскі амбасадар пра выбары ды пратэсты
Некалькі дзён таму прэзыдэнт Расеі Дзьмітрый Мядзьведзеў досыць асьцярожна пракамэнтаваў выбарчую кампанію ў суседняй краіне, сказаўшы, што гэта ўнутраная справа Беларусі. Спадар Сурыкаў пацьвердзіў, што віншаваньняў на адрас Лукашэнкі з боку Крамля няма, але патлумачыў гэта тым, што Цэнтравыбаркам яшчэ не агучыў канчатковыя лічбы волевыяўленьня беларусаў.
Агульная танальнасьць камэнтароў расейскіх палітыкаў адносна выбараў у Беларусі стрыманая. Задавальненьне выказаў хіба што даўні сябра Лукашэнкі, лідэр расейскіх камуністаў Генадзь Зюганаў. Дэмакратычныя дзеячы салідарныя зь беларускай апазыцыяй у тым, што агучаныя ЦВК лічбы сфальсыфікаваныя на карысьць Лукашэнкі. Найбольш радыкальным аказаўся віцэ-сьпікер Дзяржаўнай думы Ўладзімер Жырыноўскі. Напярэдадні ў інтэрвію тэлеканалу «Белсат» ён спрабаваў заклікаць Лукашэнку да сумленьня:
«Ну нельга сядзець колькі ўжо — 17 гадоў? Яшчэ пяць — гэта 22, потым яшчэ пяць — 27. І гэтак жа бясконца! Бо тармазоў няма ў яго. А існуюць жа праблемы. Зь якой радасьці мы павіны карміць Беларусь? Ён ілжэ, калі гаворыць, што гэта ўсё ягоныя дасягненьні. Кожны год 5 мільярдаў даляраў даем, мы іх адрываем у нашых грамадзянаў. Украіне тое ж самае будзем даваць, бо там украінскі Лукашэнка — Януковіч. І будзем зараз утрымліваць вас усіх. За якія заслугі?».
Жорстка выказаўся Жырыноўскі і адносна вынікаў выбараў. На яго думку, Лукашэнка нават пры самых лепшых умовах ня мог набраць больш за 30%:
«Дрэнныя выбары, ён прайграў. Рэальна за яго прагаласавала 30%. Гэта ўсясьветная практыка: любая ўлада можа набраць траціну. Але ніводнага голасу больш. Таму мусіць быць другі тур, і ў другім туры ён павінен быў прайграць, бо ўсе аб’ядналіся б пад адзінага кандыдата, які таксама выйшаў бы ў другі тур. Лукашэнка ўвогуле не павінен быў удзельнічаць у выбарах, і гэта было б самае лепшае. Хопіць галаву дурыць, сумленьне ж трэба мець. Зараз ён павінен сысьці, ніякай інагурацыі, абвясьціць новыя выбары і сам у іх больш ня ўдзельнічаць. Гэта зь яго боку быў бы самы лепшы ўчынак, быў бы падарунак і беларускаму народу, і расейскаму».
Першы і апошні прэзыдэнт Савецкага Саюзу Міхаіл Гарбачоў зьвярнуўся да Аляксандра Лукашэнкі з просьбай аб вызваленьні журналісткі Ірыны Халіп. Крытычныя сюжэты пра разгон мірнай акцыі апазыцыі 19 і 20 сьнежня штодня дэманструюць расейскія тэлеканалы. Нягледзячы на тое, што стаўленьне ўладаў Расеі да ўнутранай апазыцыі таксама досыць радыкальнае, аднак, падкрэсьліваюць расейскія мэдыі, цяжка знайсьці яшчэ прыклад, каб палова кандыдатаў у прэзыдэнты скончыла выбарчы маратон у турме. Дарэчы, 24 сьнежня на НТВ заплянаваная адмысловая перадача, прысьвечаная Плошчы.
Адгукнуліся на беларускія падзеі і прадстаўнікі расейскай культуры. Вядомы паэт Яўген Еўтушэнка зьвярнуўся празь Першы расейскі канал да беларускіх уладаў у абарону Ўладзімера Някляева. Сёньня ж у калектыўным лісьце прадстаўнікі расейскага шоў-бізнэсу запатрабавалі ад беларускіх уладаў вызваліць усіх затрыманых падчас акцыі 19 сьнежня. Ужываньне сілы і гвалт асудзілі кіраўнік гурту «ДДТ» Юрый Шаўчук, рэпэр NOIZE MC, удзельнікі гуртоў «НАИВ», «Элизиум», «Тараканы» ды іншыя. Ад беларусаў ліст падпісаў лідэр каманды «Ляпис Трубецкой» Сяргей Міхалок.