"Ці павінна Беларусь і далей хаваць зрынутага прэзыдэнта Кіргізстану Бакіева?" На гэтае пытаньне адказваюць жыхары Гомелю.
“Няма неабходнасьці ваяваць дзеля кіргізаў, няхай самі разьбіраюцца”
Спадарыня: "Ня трэба! Няхай едзе й свой народ абараняе. Чаго ён абараняе яго тут? Там жа страх што робіцца! А ён сядзіць, прышчаміўся добра. Калі я не вінаватая, я нікога не баюся. А калі я за такі кароткі тэрмін змагла нажыцца, тады трэба баяцца".
Спадар: "Бываюць жа ўцекачы! Будзем лічыць, што ўцякач. Ёсьць жа міжнародныя працэдуры з прадстаўленьнем матэрыялаў пра ягоную вінаватасьць. Адпаведна, паводле закону й трэба дзейнічаць".
Спадарыня: "А чаму й не? Калі чалавеку патрэбная дапамога, то чаму не аказаць яму такую дапамогу?!"
Спадар: "Мы абавязаныя яго хаваць. Паглядзіце, што зараз робіцца ў Кіргізстане, якія пачаліся ўзбурэньні! Мы ня кінулі чалавека на волю лёсу. А Расея, якая падтрымала Кіргізстан і разьвязала там гэтую бойню, Расея павінна за гэта адказваць".
Спадарыня: "Я лічу, што рабіць гэтага ня трэба, бо псуем дачыненьні з Расеяй. Мы — маленькая краіна, якой самой патрэбная дапамога. І мы застаемся без падтрымкі — і Эўропа нас не падтрымае, і Расея не падтрымае".
Спадар: "Наагул не патрэбна было зь ім зьвязвацца. Няхай бы бабай сядзеў у сябе дома. Чым ён тут будзе займацца? На градках будзе разам з тым, хто яго запрасіў?"
Спадарыня: "Мы дакладна ня ведаем, які гэта чалавек — добры ці кепскі, калі так проста казаць. Мы павінны даць чалавеку якісьці прытулак. Мы ж жывёлін абараняем, а яны не заўсёды добрыя. Бывае, і кусаюцца".
Спадарыня: "Я думаю, што ня трэба. Калі яго рэспубліка патрабуе, то трэба яго вярнуць".
Спадар: "Экстрадзіраваць на радзіму! Калі яго будуць там судзіць, няхай судзяць. Калі ён там парушыў заканадаўства, то павінен несьці адказнасьць".
Спадар: "Я калі б быў прэзыдэнтам, то не хаваў бы яго. Гэта ўжо нейкае асабістае стаўленьне… Але ў прынцыпе — трэба вярнуць яго на радзіму".
Спадар: "Я думаю, што ня трэба яго хаваць, абвастраць сытуацыю. Ён там нарабіў спраў — няхай адказвае.
Спадар: "Ня трэба хаваць — мне проста падказвае інтуіцыя".
Спадарыня: "А дзеля чаго тут яго хаваюць? Нейкія праблемы там у яго, і таму ён тут хаваецца. Назад на радзіму трэба яго выправіць".